Sport multifar e varià – quai è la gronda finamira dal nov program polisportiv «0712 – Tut enturn il sport». Il program è vegnì lantschà da l'Uffizi per la scola populara ed il sport e sa drizza a las scolaras ed als scolars primars da 7 fin 12 onns – perquai il num dal program. Als uffants duai vegnir mussada ina vasta paletta da disciplinas da sport e da furmas da moviment fundamentalas.

Cumbain ch'in trenament multifar è cumprovadamain la meglra basa tant per activitads sportivas durant l'entira vita sco er per in'eventuala carriera en il sport d'elita, existan tar las uniuns da sport mo paucas purschidas en il sectur polisportiv e senza focus sin concurrenzas. Er en il sport da scola voluntar resguardan las purschidas savens mo in'unica disciplina da sport. A medem temp existan en il Grischun dapi blers onns ils «GKB SPORTKIDS» – in instrument d'entrada polisportiv cumprovà ed efficazi per uffants da 5 fin 6 onns da l'entir territori chantunal. Per uffants che vulessan silsuenter gugent far vinavant bleras differentas disciplinas da sport e betg en mintga cas sa participar a concurrenzas, existan – tut tenor il lieu da domicil – dentant mo paucas u insumma naginas purschidas.

Focus sin regiuns cun paucas purschidas
Cun sias 35 lecziuns da sport dublas tar tut las furmas da moviment fundamentalas pussibilitescha il program «0712» ch'er manadras e manaders cun damain experientscha u cun ina scolaziun main variada pon porscher in trenament attractiv e multifar. Tut las lecziuns èn cumpatiblas cun Giuventetgna+Sport e cun il Plan d'instrucziun 21 e pon pia vegnir realisadas directamain en l'uniun ed en scola. In focus metta «0712» cunzunt sin regiuns che han paucas purschidas sportivas. Il cusseglier guvernativ e minister da sport Jon Domenic Parolini accentuescha quest aspect: «En lieus ed en vals cun paucas uniuns u cun uniuns che pratitgeschan mo ina disciplina da sport sa porscha la schanza d'installar ina nova purschida che pledenta dapli uffants. Ma natiralmain che tut las uniuns e scolas en il chantun pon sa participar al program.»

Remunerar la multifariadad
L'Uffizi per la scola populara ed il sport è conscient da la lavur preziusa e voluminusa da las uniuns da sport e da las persunas d'instrucziun che s'engaschan per il sport da scola voluntar. Tras la lantschada da «0712» vuless l'uffizi perquai sustegnair lur stentas per purschidas da moviment e da sport per tut ils uffants. Thierry Jeanneret, manader da la partiziun graubündenSport, davart ils motivs: «Uschia pon vegnir tschiffadas duas mustgas cun in schlop: Las uniuns da sport porschan trenaments polisportivs supplementars, realiseschan lecziuns sin basa e tenor las directivas da ‹0712› e survegnan perquai ina indemnisaziun pli gronda – ed ils uffants da tut las regiuns pon profitar uschia da lecziuns multifaras.»

Project da pilot en dus lieus
«0712» è vegnì testà durant l'emprim semester da l'onn da scola 2021/22 sco project da pilot en dus lieus en totalmain trais gruppas. En il rom dal sport da scola voluntar da la scola da Sedrun sco er tras l'Uniun da gimnastica da Vaz Sut èn las lecziuns vegnidas testadas en la pratica. Quai cun accumpagnar stretgamain las manadras ed ils manaders sco er cun interrogar a la fin ils uffants participads e lur geniturs. Da l'enquista dals geniturs èsi oravant tut resortì che bundant 60 pertschient tschernan sapientivamain ina purschida da sport multifara per lur uffant e ch'in ulteriur quart dals geniturs giavischa ina purschida da «tant l'in sco l'auter»: multifariadad e disciplinas da sport specificas. Ils uffants han stimà la gronda variaziun – las manadras ed ils manaders han punctuà las lecziuns detagliadas ch'èn descrittas en moda chapaivla ed illustradas da maniera professiunala. Las enconuschientschas èn vegnidas integradas en la concepziun definitiva dal program. Il sustegn finanzial dal chantun per las organisaziuns participantas è per entant garantì fin l'onn 2025.

Infurmaziuns:

Thierry Jeanneret, manader da la partiziun graubündenSport, Uffizi per la scola populara ed il sport, tel. +41 81 257 27 55, e‑mail Thierry.Jeanneret@avs.gr.ch

Responsabladad: Uffizi per la scola populara ed il sport