Tar las preparativas per la stagiun da pestga tutga er la retratga da la patenta da pestga. Per pudair retrair ina patenta per in onn u ina patenta per in mais ston ins cumprovar d'avair enconuschientschas da la pestga (attest davart las enconuschientschas da la materia AEM). Per infurmaziuns davart il AEM, davart purschidas da curs, davart il barat e davart la perdita da documents da legitimaziun e.u.v. guardar sut: www.anglerausbildung.ch.
I n'è vinavant betg pussaivel da cumprar patentas per ina stagiun u per in mais senza AEM. Las ulteriuras patentas da pestga pon vegnir retratgas er senza AEM.
Tut las categorias da patentas pon vegnir retratgas en la butietta online dal UCP: www.ajf.gr.ch
Vinavant èsi er pussaivel da retrair tut las patentas en il Museum da la natira dal Grischun (MNG) a Cuira (mardi fin sonda, 10.00‑17.00) e tar ils survegliaders da pestga durant las uras da biro suenter ina preannunzia, e quai en daner blut resp. sin via electronica (MaestroCard, PostCard, MasterCard, Visa, TWINT).
App da pestga
La statistica da pestga sto vegnir manada en emprima lingia sin via electronica cun l'app da pestga dal Grischun. Infurmaziuns detagliadas per duvrar e per chargiar giu l'app da pestga chattais Vus sut: www.ajf.gr.ch/Fischerei-App
A chaschun da la retratga da la patenta ha la pestgadra u il pestgader però vinavant la pussaivladad da sa decider da manar la statistica da pestga a maun. La moda d'endataziun tschernida vala per l'entira stagiun da pestga e na po betg pli vegnir midada.
Actualmain endateschan passa 50% da las pestgadras e dals pestgaders lur peschs pigliads en l'app da pestga. Nossa finamira è che quai sajan en 5 onns 100% e che la statistica da pestga a maun tutgia lura al passà. Midai anc oz a l'app da pestga!
Infurmaziuns e formulars
En il Fegl uffizial dal chantun Grischun dals 31 da mars 2022 e sin la pagina d'internet da l'Uffizi da chatscha e pestga www.ajf.gr.ch èn publitgadas las premissas per retrair la patenta. Sche terzas persunas vulan retrair patentas per persunas cun domicil en il chantun Grischun, ston ellas preschentar in attest da domicil persunal da la petenta u dal petent da la patenta. Formulars correspundents pon vegnir chargiads giu da la pagina d'internet da l'Uffizi da chatscha e pestga.
Buna pestga!
Responsabladad: Uffizi da chatscha e pestga