Cun Dario Cologna, Nevin Galmarini e Carlo Janka èn sa retratgs la fin da questa stagiun gist trais anteriurs campiuns olimpics dal sport d'elita activ. En num da la Regenza grischuna ha il minister da sport Jon Domenic Parolini engrazià a las trais persunalitads dal sport grischun che han represchentà en moda uschè stupenta il chantun Grischun sco ambassadurs.

En renconuschientscha da lur prestaziun extraordinaria ha il cusseglier guvernativ Jon Domenic Parolini envidà ils trais anteriurs campiuns dal classament general da la cuppa mundiala ad in gentar a Cuira. Cun surdar in «banchin da pensiun» ha il minister da sport grischun gratulà als trais sportists exemplarics per lur carriera curunada da success durant blers onns. Tranter auter als ha el engrazià per esser stads ed anc adina esser exempels sportivs per la giuventetgna grischuna ed ha giavischà als trais campiuns olimpics tut il bun per lur avegnir. Er preschents a l'inscunter èn stads il president da la Federaziun da skis grischuna, Gaudenz Bavier, ed il president da l'Associaziun grischuna da sport, Thomas Gilardi. Omadus han da lur vart undrà ils merits dal trio che ha cuntanschì en total 116 plazs da podest en la cuppa mundiala.

Atlets excepziunals cun in palmarès extraordinari
Dario Cologna ha gudagnà durant la stagiun 2008/09 sco emprim Svizzer insumma il classament general da la cuppa mundiala da passlung. Tut en tut ha el pudì decider per sai quatter giadas il Tour de ski ed il classament general da la cuppa mundiala da passlung. Tar gieus olimpics è el stà quatter giadas il pli sisum sin il podest e l'onn 2013 è el daventà campiun mundial en il skiatlon.

Carlo Janka è daventà campiun mundial en il slalom gigant l'onn 2009 ed il 2010 campiun olimpic en la medema disciplina. En quella stagiun ha el er decis per sai il classament general da la cuppa mundiala. Tut en tut ha el festivà 11 victorias en la cuppa mundiala en quatter differentas disciplinas.

Nevin Galmarini ha gudagnà als Gieus olimpics d'enviern 2014 a Sotschi ina medaglia d'argient en il slalom gigant parallel, avant ch'el è daventà l'onn 2018 a Pyeongchang campiun olimpic en la medema disciplina. Il victur da la medaglia da bronz als campiunadis mundials è stà 12 giadas sin il podest da la cuppa mundiala ed ha gudagnà il 2018 il classament general da quella.

Fotografias agiuntadas:

Infurmaziuns:

Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e-mail Jondomenic.Parolini@ekud.gr.ch

Responsabladad: Departament d'educaziun, cultura e protecziun da l'ambient