Il nov president da la Conferenza dals directurs da construcziun, da planisaziun e da l'ambient dals chantuns da la Svizra orientala (CCPA-ost) sa numna Marcus Caduff. El è vegnì elegì en quest uffizi a chaschun da la 50avla radunanza da la CCPA-ost, che ha gì lieu a Cuira.
Il president da la Regenza Marcus Caduff succeda a la cussegliera guvernativa dal chantun Turgovia Carmen Haag che vegn a bandunar la Regenza da la Turgovia per la fin da matg 2022. Sco president da la Conferenza da la Svizra orientala fa el automaticamain er part da la Conferenza naziunala da construcziun, da planisaziun e da l'ambient. La conferenza da las cusseglieras e dals cussegliers guvernativs ch'èn cumpetents per ils fatgs da construcziun, da planisaziun e da l'ambient s'occupa dals temas construcziun, planisaziun dal territori, ambient, vias, traffic ed acquisiziuns publicas.
La CCPA-ost cumpiglia ils chantuns Appenzell Dadora, Appenzell Dadens, Glaruna, Grischun, Schaffusa, Son Gagl, Turgovia, Turitg sco er il principadi da Liechtenstein.
Infurmaziuns:
president da la Regenza Marcus Caduff, schef dal Departament d'economia publica e fatgs socials, tel. +41 81 257 23 01, e‑mail
Marcus.Caduff@dvs.gr.ch
Responsabladad: Departament d'economia publica e fatgs socials