Navigation

Inhaltsbereich

  • Erste Mitteilung
  • Neuen Beitrag einfügen
La Regenza ha concedì ina contribuziun chantunala per in nov implant da sport turistic a Savognin ed ha dà glisch verda per sviluppar vinavant la purschida da campar en la regiun Partenz/Tavau. Ultra da quai ha ella prendì la decisiun davart la repartiziun da la collecta da la Rogaziun federala 2022, da la dieschma d'alcohol e da las taxas da patenta d'alcohol ad organisaziuns d'utilitad publica.

Contribuziun chantunala per in nov implant da sport turistic a Savognin

En il rom da la Nova politica regiunala (NPR) ha la Regenza concedì a la vischnanca da Surses ina contribuziun chantunala da circa 196 000 francs per construir las plazzas da sport La Nars a Savognin. La contribuziun vegn concedida en connex cun in emprest tenor NPR da la Confederaziun dad 844 000 francs. A chaschun da la votaziun a l'urna dals 13 da mars 2022 e resguardond questas contribuziuns han las votantas ed ils votants da la vischnanca da Surses approvà in credit d'impegn da 4,5 milliuns francs per quest project.

Il project prevesa da construir ina plazza da glatsch artifizial, trais plazzas da tennis, in restaurant sco er in edifizi da manaschi ed in deposit. Questa nova infrastructura turistica duai star a disposiziun en l'avegnir durant la stad cunzunt per dar tennis e durant l'enviern per far sport sin glatsch. Plinavant duai ella servir sco areal d'exercizi da la scola per sport da naiv. Cun la construcziun da las plazzas da sport augmenta la vischnanca da Surses la qualitad e l'attractivitad da la purschida existenta en la destinaziun e pussibilitescha uschia in'ulteriura valurisaziun turistica.

Sportanlage La Nars Savognin

©Uffer Savognin

En il rom da la Nova politica regiunala (NPR) ha la Regenza concedì a la vischnanca da Surses ina contribuziun chantunala da circa 196 000 francs per construir las plazzas da sport La Nars a Savognin.

Glisch verda per sviluppar vinavant la purschida da campar en la regiun Partenz/Tavau

La Regenza ha approvà il Plan directiv regiunal «Campadis», ch'era vegnì concludì da la regiun Partenz/Tavau ils 25 da november 2021. Cun quest plan directiv vegnan fixadas las finamiras e las directivas liantas per las autoritads per sviluppar vinavant campadis existents sco er per planisar novs campadis.

Da princip duai vegnir engrondida la purschida generala da las pussaivladads da campar en la regiun. Ultra da quai duai vegnir satisfatg almain per part al basegn cumprovà. Il plan directiv prevesa per exempel in nov campadi en il territori Lengland a Claustra sco er l'engrondiment dal campadi a Tavau. Per planisar purschidas supplementaras da campar stgaffescha la regiun – tuttina sco per sviluppar vinavant campadis existents – prescripziuns correspundentas en il plan directiv.

La Regenza ha approvà il Plan directiv regiunal «Campadis», ch'era vegnì concludì da la regiun Partenz/Tavau ils 25 da november 2021. 

Collecta da la Rogaziun federala 2022

Tenor il conclus da la Regenza vegn mintgamai in terz dal retgav or da la collecta da la Rogaziun federala 2022 attribuì a las suandantas organisaziuns: a la Federaziun grischuna da las senioras e dals seniors, a l'uniun FRAGILE Svizra orientala ed al post da coordinaziun da l'Agid a sasez Grischun. Questas organisaziuns furneschan servetschs prezius a favur da la populaziun grischuna ed èn stadas spezialmain dumandadas durant ils onns da pandemia passads.

Il Di da la Rogaziun federala è ils 18 da settember 2022. Quel di vegn fatga en tut las baselgias dal chantun ina collecta per intents d'utilitad publica. L'utilisaziun da quella vegn determinada da la Regenza. En il quint 2021 ha la collecta importà 20 400 francs. Per l'onn 2022 vegni quintà cun ina collecta da 21 000 francs.

 

Tenor il conclus da la Regenza vegn mintgamai in terz dal retgav or da la collecta da la Rogaziun federala 2022 attribuì a las suandantas organisaziuns: a la Federaziun grischuna da las senioras e dals seniors, a l'uniun FRAGILE Svizra orientala ed al post da coordinaziun da l'Agid a sasez Grischun.

Contribuziuns or da las taxas da patenta d'alcohol e da la dieschma d'alcohol

Differentas organisaziuns, instituziuns, uniuns, federaziuns e fundaziuns d'utilitad publica survegnan quest onn ina contribuziun da totalmain 370 000 francs or dal retgav da las taxas da patenta d'alcohol. Tenor la Lescha d'ustaria vegnan in terz dal retgav net dal chantun or da la taglia dal commerzi en detagl cun bavrondas destilladas duvrà per intents d'utilitad publica e dus terzs per la promoziun dal turissem.

Ultra da quai vegnan pajads ora en il chantun Grischun tut en tut 718 889 francs or da la dieschma d'alcohol da la Confederaziun. Ils meds finanzials vegnan duvrads per mesiras d'infurmaziun che duain gidar a prevegnir cunter problems d'alcohol sco er cunter l'abus da drogas, da narcotics e da medicaments. Plinavant vegnan ils meds finanzials impundids per mesiras per assister uffants e giuvenils da famiglias cun problems da dependenza d'alcohol sco er per programs che sa drizzan a gruppas da ristga. Ultra da quai vegnan cofinanziads posts da cussegliaziun spezialisads sco er instituziuns d'assistenza e da tractament per persunas dependentas d'alcohol, da tissis enivrants, da medicaments e da drogas. Tenor la Lescha d'alcohol survegnan ils chantuns 10 pertschient dal retgav net da l'Administraziun federala d'alcohol (dieschma d'alcohol).

Differentas organisaziuns, instituziuns, uniuns, federaziuns e fundaziuns d'utilitad publica survegnan quest onn ina contribuziun da totalmain 370 000 francs or dal retgav da las taxas da patenta d'alcohol.

Contribuziun chantunala per la sanaziun dal provediment d'aua a Soazza

La Regenza ha garantì a la vischnanca da Soazza ina contribuziun chantunala da maximalmain 672 500 francs per sanar ses provediment d'aua. La garanzia da la contribuziun chantunala premetta in subvenziunament correspundent tras la Confederaziun. L'Uffizi federal d'agricultura cumpetent ha gia empermess ina contribuziun federala da var 747 200 francs. Ils custs totals da la sanaziun vegnan calculads cun circa 2,99 milliuns francs. Il project cumpiglia la sanaziun da la chombra d'aua, la construcziun d'in nov reservuar d'aua e la meglieraziun dal sistem dal provediment d'aua en la zona d'agricultura.

Sanierung SoazzaSanierung Soazza

La Regenza ha garantì a la vischnanca da Soazza ina contribuziun chantunala da maximalmain 672 500 francs per sanar ses provediment d'aua. 

Taxas per valitaziuns da revisiun vegnan reducidas

La Regenza ha approvà la revisiun parziala da l'Ordinaziun davart las valitaziuns uffizialas d'immobiglias. Questa ordinaziun vegn messa en vigur il 1. da fanadur 2022. Cun la revisiun parziala vegnan las taxas che las vischnancas ston pajar per valitaziuns da revisiun reducidas da 0,125 a 0,1 promils da la valur da nov.

La Regenza ha approvà la revisiun parziala da l'Ordinaziun davart las valitaziuns uffizialas d'immobiglias

Neuer Artikel
Responsabladad: Regenza