Navigation

Inhaltsbereich

  • Erste Mitteilung
  • Neuen Beitrag einfügen

Venderdi, ils 20 da matg 2022, n'è Cuira betg mo la chapitala grischuna, mabain er il center svizzer dal sport da scola. Var 2500 scolaras e scolars dal stgalim secundar I da l'entira Svizra vegnan quel di en il Grischun per sa participar al Di svizzer da sport da scola.

Il Di svizzer da sport da scola è l'occurrenza da sport da scola la pli gronda en Svizra. Sa participar pon scolaras e scolars da l'ultim onn da scola obligatoric, en cas excepziunals er dal segund ultim u dal terz ultim onn da scola. Per regla ston ellas ed els sa qualifitgar en concurrenzas chantunalas en ina da las 12 disciplinas da sport atletica leva, badminton, ballabasket, ballamaun, ballarait, beachvolley, cursa d'orientaziun, gimnastica d'urdains, nudar, pingpong, staffetta polisportiva ed unihoc. «Nus ans legrain fitg da dastgar beneventar a Cuira las scolaras ed ils scolars sco er lur assistentas ed assistents», di il president dal comité d'organisaziun Thierry Jeanneret da l'Uffizi per la scola populara ed il sport. Ed el accentuescha: «A tut las participantas ed ils participants vulain nus porscher in ambient da concurrenza optimal ed in di nunemblidaivel.»

Cun la terza emprova hai funcziunà
En sasez avess Cuira gì da realisar il Di svizzer da sport da scola gia l'onn 2020. Ma il coronavirus ha impedì ils plans dal comité d'organisaziun; l'occurrenza è vegnida spustada duas giadas. Tant pli grond è il plaschair ch'i funcziuna ussa. Per pudair organisar in'occurrenza da tala dimensiun dovri ina planisaziun detagliada ed ina preparaziun precisa. Ils differents ressorts lavuran gia dapi mais intensivamain vi da la publicaziun, vi da la logistica e vi dals uraris. Mintga disciplina vegn tgirada da persunas dal fatg da las uniuns grischunas respectivas. Uschia èsi garantì che las arbitras ed ils arbiters sco er las gidantras ed ils gidanters – tut en tut var 400 persunas voluntaras – èn infurmads perfetgamain e pussibiliteschan concurrenzas fairas.

Numerus lieus da concurrenza a Cuira ed en ils conturns
Per pudair manar tras las differentas disciplinas dovri numerus lieus da concurrenza. A Cuira èn bunamain tut las hallas da gimnastica, plazzas da sport ed er il stabiliment da sport Obere Au reservads quel di per il Di da sport da scola. En il Fürstenwald ha lieu l'avantmezdi la cursa d'orientaziun individuala; la cursa d'orientaziun da staffetta maina il suentermezdi tras la citad veglia. Duas disciplinas han lieu ordaifer la chapitala grischuna: gimnastica d'urdains a Trimmis e ballarait a Domat. Il comité d'organisaziun engrazia a la citad da Cuira ed a las vischnancas vischinas per il sustegn e per metter a disposiziun l'infrastructura da sport.

Livestream als Warmup
Cumbain ch'i guarda ora fitg bain questa giada per il Di da sport da scola en cumparegliaziun cun ils onns precedents, ha il coronavirus tuttina anc consequenzas per la realisaziun. Ord vista da la sanadad vegni perquai desistì da la festa d'avertura tradiziunala, a la quala tut las atletas ed ils atlets fissan sa radunads en in lieu central per avrir uffizialmain ils gieus. «Empè da quai revegnin nus a la tecnica moderna», di Thierry Jeanneret, «e producin in'emissiun per sa stgaudar che nus transmettain per l'avertura da l'event via stream sin YouTube. Uschia pon tut las participantas ed ils participants assister a l'avertura gia sin il viadi d'arriv, al lieu da concurrenza u a l'agen telefonin.» Il cusseglier guvernativ dr. Jon Domenic Parolini vegn ad avrir l'occurrenza en la halla «Thomas Domenig» ed a beneventar las participantas ed ils participants ensemen cun Urs Marti, president da la citad da Cuira.

Infurmaziuns davart il Di da sport da scola èn disponiblas en l'internet sut www.schulsporttag.ch.

Infurmaziuns:

Thierry Jeanneret, manader da la partiziun Sport, Uffizi per la scola populara ed il sport, tel. +41 81 257 27 55, e‑mail Thierry.Jeanneret@avs.gr.ch


Responsabladad: Uffizi per la scola populara ed il sport

Neuer Artikel