La Regenza ha nominà Andreas Kohne sco nov manader da l'Uffizi da construcziun auta. El vegn a surpigliar questa funcziun il 1. da schaner 2023.
La Regenza ha tschernì Andreas Kohne sco nov architect chantunal e pia sco manader da l'Uffizi chantunal da construcziun auta. L'um da 50 onns daventa successur da Markus Dünner che va en pensiun suenter avair manà l'Uffizi da construcziun auta durant blers onns.
Andreas Kohne ha in diplom da master en architectura da la SPF Turitg ed in Certificate of Advanced Studies (CAS) en Leadership e Governance da l'Universitad da Turitg. Actualmain è el londervi da far in CAS en Urban Management a l'Universitad da Turitg. Quest studi metta l'accent sin il svilup d'immobiglias, dal territori ed urban. Suenter ch'el ha prestà durant plirs onns lavur da project per dus biros d'architectura svizzers pli gronds, è el engaschà dapi l'onn 2007 sco architect independent ed expert sco er dapi l'onn 2017 sco manader dals fatgs da las studentas e dals students d'architectura a la Scola auta turitgaisa per scienzas applitgadas (ZHAW). Andreas Kohne è stà primassistent ed incumbensà per l'instrucziun da Sboz e construcziun a la SPF Turitg ed instruescha actualmain Istorgia da la construcziun a l'Universitad da Liechtenstein.
Sco post spezialisà dal sectur da construcziun dal chantun Grischun tgira l'Uffizi da construcziun auta ils interess dal chantun sco proprietari e possessur d'immobiglias ubain sco patrun da construcziun ed è responsabel per tut las prestaziuns dal management d'immobiglias. Quai cumpiglia la structuraziun dal portfolio d'immobiglias, la planisaziun, la realisaziun e la gestiun d'immobiglias sco er la cussegliaziun. Ultra da quai furnescha l'Uffizi da construcziun auta contribuziuns impurtantas a la cultura da planisaziun e da construcziun en il chantun e promova innovaziuns en ils secturs da la construcziun persistenta e da la transfurmaziun digitala en ils fatgs da construcziun. Tut en tut ha l'uffizi la responsabladad per var 500 immobiglias.
Fotografia agiuntada:
Infurmaziuns:
Cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01 (cuntanschibel da las 9.00 fin las 12.00), e-mail Mario.Cavigelli@diem.gr.ch
Responsabladad: Regenza