En las diesch regiuns da la Cuminanza da lavur da las regiuns alpinas (ARGE ALP) vegnan emplantads – a chaschun dal giubileum da 50 onns da la ARGE ALP – mintgamai 500 bostgs. Cun questa acziun vegni rendì attent, ch'in guaud che cuntegna in grond dumber da spezias da bostgs, è la meglra strategia per l'adattaziun a la midada dal clima. En il Grischun vegnan emplantads quests bostgs la primavaira e l'atun 2022 en differentas vischnancas da la Val dal Rain da Cuira. L'acziun d'emplantar bostgs dals 8 da zercladur cun il cusseglier guvernativ Mario Cavigelli vala a medem temp sco cumenzament dal project transcunfinal «Spezias da bostgs adattadas a la midada dal clima per ils guauds da muntogna da la ARGE ALP».

In guaud da muntogna saun e stabil è da gronda impurtanza per il Grischun sco chantun da muntogna. Perquai che las cundiziuns climaticas vegnan a sa midar durant ils proxims decennis, è ina diversitad da las spezias da bostgs uschè vasta sco pussaivel da fitg gronda impurtanza. Per sustegnair la regiuvinaziun natirala vegnan pia emplantadas gia oz differentas spezias da bostgs. Uschia pon quests bostgs surpigliar ina rolla impurtanta per il guaud da damaun.

Garantir las funcziuns dal guaud
Il guaud cuvra circa in terz da la surfatscha dal Grischun. Var dus terzs da quest guaud protegian ils abitadis, las infrastructuras e las vias da traffic directamain cunter privels da la natira sco lavinas, crudada da crappa u bovas. Il guaud ademplescha però bleras autras funcziuns, er a favur da la biodiversitad ubain sco spazi da recreaziun per l'uman. Questas funcziuns vali da garantir er durant la midada dal clima. Tras la midada dal clima s'augmentan las temperaturas ed i dat pli savens periodas da setgira pli lungas. L'augment da las temperaturas ha per consequenza, che las cundiziuns optimalas per las spezias da bostgs vegnan a sa spustar – tenor las aspectativas actualas – per almain 500 meters autezza plinensi. Sco mesira accumpagnanta a questa midada en noss guauds da protecziun èn er necessarias emplantaziuns da sustegn.

In allevament da plantinas forestalas d'origin indigen
Il Curtin forestal chantunal producescha e venda plantinas forestalas dapi l'onn 1956. Las clientas ed ils clients ils pli impurtants èn las vischnancas ed ils manaschis forestals en il chantun Grischun sco er en ils chantuns cunfinants. Il provediment cun plantinas forestalas adattadas vegn en il futur a daventar pli pretensius, pervia da las cundiziuns che sa midan. Perquai che las spezias da bostgs s'adattan sur generaziuns a las cundiziuns localas, èn spezias da bostgs che derivan da regiuns da l'Europa pli chaudas e pli sitgas, alternativas che ston vegnir examinadas. In barat suror ils cunfins naziunals sto pia vegnir prendì en mira. Il chantun Grischun sa participescha perquai cun il Curtin forestal Rodels al project da la ARGE ALP «Spezias da bostgs adattadas a la midada dal clima per ils guauds da muntogna da la ARGE ALP».

Collavuraziun internaziunala per l'allevament da plantinas forestalas
Al project èn participadas tut las diesch regiuns, provinzas, chantuns e pajais federativs da la regiun da la ARGE ALP cun lur servetschs e curtins forestals. Il project dura fin il 2024 ed ha la finamira d'etablir ina rait per barattar regularmain las experientschas e per transferir la savida entaifer la regiun da las Alps.

Fotografia agiuntada:

Infurmaziuns:

• Marco Vanoni, manader dal sectur Guaud da protecziun ed ecologia dal guaud, Uffizi da guaud e privels da la natira, tel. +41 81 257 38 57 (cuntanschibel da las 16.00 fin las 17.30), e-mail Marco.Vanoni@awn.gr.ch
• Francesco Bonavia, manader dal Curtin forestal Rodels, Uffizi da guaud e privels da la natira, tel. +41 81 257 21 10 (cuntanschibel da las 16.00 fin las 17.30), e-mail Francesco.Bonavia@awn.gr.ch

Responsabladad: Uffizi da guaud e privels da la natira