La Regenza ha dà glisch verda per in nov med d'instrucziun en tut las linguas da scola e per in project collectiv per ovras da protecziun.
Nov med d'instrucziun per geografia ed istorgia da la Svizra en tut las linguas da scola
La
Regenza ha dà glisch verda per elavurar in nov med d'instrucziun «Viadi
d'exploraziun tras la Svizra» per tut las linguas da scola. Concretamain
prevesa il concept da translatar il carnet tematic existent «Via d'exploraziun
tras la Svizra» da la chasa editura «Handschin & Handschin ScRL» en
sutsilvan, rumantsch grischun e talian. Las translaziuns en sursilvan, puter e
vallader stattan gia a disposiziun u èn en elavuraziun. Il
carnet surmiran vegn percunter duvrà il pli baud per l'onn da scola 2025/26.
Il carnet
tematic che cumpiglia 64 paginas, ha la finamira d'intermediar la geografia e
l'istorgia da la Svizra a las scolaras ed als scolars da la 5. e 6. classa
primara. Cun 13 posts davart la geografia ed anc ina giada 13 posts davart
l'istorgia da la Svizra elavuran las scolaras ed ils scolars las cumpetenzas
dal Plan d'instrucziun 21 Grischun en ils champs «Umans tiran a niz spazis
– s'orientar e gidar a concepir» e «Chapir il temp, la durada e la midada –
distinguer istorgia ed istorgias». In chantun represchenta qua adina
exemplaricamain in tema, il qual vegn elavurà a maun d'incumbensas captivantas
ch'èn orientadas a l'acziun. Ils custs totals dal project importan var
140 000 francs.
© Handschin
& Handschin ScRL
La Regenza ha dà glisch verda per elavurar in nov med d'instrucziun «Viadi d'exploraziun tras la Svizra» per tut las linguas da scola.
Approvà in project collectiv per ovras da protecziun
La
Regenza ha approvà il project collectiv «Reparaziun d'ovras da protecziun 2022»
da differentas vischnancas, da la Viafier retica e da l'Uffizi da construcziun
bassa dal Grischun. Plinavant ha ella concedì ina contribuziun chantunala da
circa 3,4 milliuns francs per realisar quel.
Il
project ha la finamira da conservar ovras da protecziun existentas cunter
privels da la natira mantegnend il standard oriund sco er da meglierar l'effect
da quests stabiliments. Questas mesiras da mantegniment ston en mintga cas
vegnir realisadas per mantegnair l'effect da protecziun e per betg augmentar la
ristga da privels da la natira per ils abitadis e per las infrastructuras da
traffic. En il rom dal project collectiv vegnan reparads 26 objects entaifer
2 onns. Tut en tut èn vegnids budgetads 4,4 milliuns francs per
realisar il project.
Glista dals projects d'ovras da protecziun 2022
La Regenza ha approvà il project collectiv «Reparaziun d'ovras da protecziun 2022» da differentas vischnancas, da la Viafier retica e da l'Uffizi da construcziun bassa dal Grischun.
