Navigation

Inhaltsbereich

  • Erste Mitteilung
  • Neuen Beitrag einfügen

Il chantun duai survegnir ina posiziun pli ferma sco patrun attractiv e modern. Per pudair recrutar e tegnair las persunas spezialisadas ed ils caders necessaris duain vegnir meglieradas las cundiziuns d'engaschament e da lavur. Las mesiras duain garantir ch'il chantun po furnir sias prestaziuns a favur da la populaziun e da l'economia.

En il program da la Regenza 2021–2024 han il Cussegl grond e la Regenza fixà la finamira ch'il chantun porschia a sias collavuraturas ed a ses collavuraturs cundiziuns d'engaschament e da lavur progressivas cun prestaziuns da salari, prestaziuns socialas e prestaziuns accessoricas al salari cumpetitivas. La missiva tar la revisiun parziala da la Lescha davart la relaziun da lavur da las collavuraturas e dals collavuraturs dal chantun Grischun (Lescha dal persunal) è in pass impurtant per cuntanscher questa finamira.

Meglierar la cumpetitivitad en in martgà da lavur che sa mida svelt
L'administraziun, las dretgiras ed ils instituts chantunals autonoms da dretg public dal chantun sa chattan en ina concurrenza naziunala per bun persunal. Pervia da la midada demografica, pervia da la mancanza da persunas spezialisadas e pervia da la mobilitad creschenta daventa questa concurrenza pli e pli gronda. En la cumparegliaziun traversala è il chantun vegnì en in cler dischavantatg. Dapi onns ha il chantun problems pli e pli gronds da recrutar las persunas spezialisadas ed ils caders ch'èn necessaris per instituziuns modernas ed effizientas.

Basegn d'agir urgent
Bunamain la mesadad da las collavuraturas e dals collavuraturs da l'administraziun chantunala ha 50 onns u dapli. Quest persunal sto vegnir remplazzà ils proxims var 15 onns. Mo gia per cumpensar questas extradas natiralas sto l'administraziun chantunala recrutar en media mintga onn 230 novas collavuraturas e collavuraturs. Las annadas cun bleras naschientschas (uschenumnads «babyboomers») bandunan bainbaud il martgà da lavur. Las annadas vegnintas han plitgunsch paucas naschientschas. Sin il martgà da lavur hai perquai bler damain entradas persunal giuven che sortidas da persunal pli vegl. A quest fatg stoi vegnir reagì svelt e cun cleras finamiras.

Meglieraziuns en il sectur da la cumpatibilitad da la professiun cun la famiglia resp. cun la vita privata
Per ch'il chantun possia vinavant ademplir sia incarica da prestaziun envers la populaziun ed envers l'economia en moda effizienta, a temp util ed en auta qualitad, sto el recrutar e tegnair il persunal qualifitgà necessari. Tras la revisiun parziala da la Lescha dal persunal duai perquai vegnir meglierada la cumpatibilitad da la professiun cun la famiglia resp. cun la vita privata. Collavuraturas e collavuraturs cun famiglia duain survegnir in sustegn finanzial per laschar tgirar lur uffants tras terzas persunas e pudair reducir lur pensum da lavur suenter la naschientscha u suenter l'adopziun d'in uffant. La lavur a temp parzial duai vegnir promovida. Plinavant duain las collavuraturas ed ils collavuraturs da 21 fin 59 onns survegnir tuttina bleras vacanzas sco quai ch'i vegn concedì tar patrunas e patruns cumparegliabels. Ultra da quai duai il pensiunament vegnir flexibilisà supplementarmain ed il dretg chantunal da persunal duai vegnir avischinà anc pli fitg al dretg da lavur privat.

Qua tras duai vegnir garantì ch'il chantun po furnir sias prestaziuns a favur da la populaziun e da l'economia, ed i duain vegnir prendidas las dretgas decisiuns per il futur dal chantun Grischun.

Il project duai vegnir tractà en il Cussegl grond en la sessiun d'avust 2022. La revisiun parziala duai entrar en vigur il 1. da schaner 2023.

Agiunta:

Missiva

Infurmaziuns:

  • cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e‑mail Christian.Rathgeb@dfg.gr.ch
  • Fernando Guntern, manader da l'Uffizi da persunal, tel. +41 81 257 32 24, e‑mail Fernando.Guntern@pa.gr.ch

Responsabladad: Regenza

Neuer Artikel