Navigation

Inhaltsbereich

  • Erste Mitteilung
  • Neuen Beitrag einfügen
La Regenza ha approvà in project per ulteriuras analisas da la bova da Brinzauls. Plinavant ha ella dà glisch verda al remplazzament d'ina punt sin la via da Sursaissa sco er ad ina correcziun voluminusa da la via da Valzeina.

Bova da Brinzauls: Novs models ed examinaziun d'ina gallaria da drenascha

La Regenza ha approvà in project per analisas consecutivas en connex cun la bova da Brinzauls. Ultra da quai ha ella concedì ina contribuziun chantunala dad 1,35 milliuns francs per quest project.

Il vitg da Brinzauls en la vischnanca d'Alvra è situà sin ina gronda bova che s'extenda sur passa 1000 meters d'autezza – dals culms da Brinzauls fin giu tar l'Alvra. Perquai che las defurmaziuns dal terren creschan cuntinuadamain dapi il cumenzament dal 21. tschientaner, vegn la bova da Brinzauls survegliada sistematicamain dapi l'onn 2009, ed igl è en funcziun in sistem da preavertiment. Pervia dal svilup fitg disfavuraivel da las ratas da spustament èn vegnidas fatgas – a partir da l'onn 2017 – analisas geologicas detagliadas cun sondagis e cun ulteriuras metodas geologicas, geofisicalas ed idrogeologicas. Ils moviments s'accelereschan vinavant fermamain. Sin fundament da quai e sin basa da las enconuschientschas ch'èn sa mussadas tras questas analisas, han las autoritads inizià il cumenzament da l'onn 2020 scleriments detagliads davart la realisabladad da mesiras da sanaziun. Resultà è in project d'ina gallaria da sondagi d'ina lunghezza da 635 meters. Las enconuschientschas fatgas fin ussa han mussà ch'i dovra analisas consecutivas supplementaras tant per prognostitgar e per giuditgar scenaris da svilup e da periclitaziun sco er per planisar e per projectar mesiras da sanaziun (engrondiment da la gallaria da sondagi ad ina gallaria da drenascha).

Il project «Analisas consecutivas da la bova da Brinzauls» metta ussa il focus sin la dumonda, co che la bova vegn a sa sviluppar en l'avegnir. En spezial, tge consequenzas ch'ina eventuala gallaria da drenascha ha per la bova e cun tge probabilitad ch'ins sto spetgar grondas crudadas da grippa. Parallelamain a questas analisas consecutivas èsi planisà da suttametter ina missiva al Cussegl grond. Cun questa missiva duai vegnir dumandà in credit d'impegn da circa 40 milliuns francs per construir ina gallaria da drenascha.

Rutschung Brienz

La Regenza ha approvà in project per analisas consecutivas en connex cun la bova da Brinzauls.

Nova punt cun novas fermadas da bus sin la via da Sursaissa

La Regenza ha approvà il project d'exposiziun per la sanaziun da la punt dal St. Petersbach tranter las fracziuns Meierhof e Tobel sco er per la correcziun correspundenta da la via da Sursaissa. Il traject da colliaziun en il Schlettertobel na correspunda betg pli a las pretensiuns d'ozendi envers ina via chantunala. Ultra da quai è la surstructura donnegiada e defurmada, perquai ch'ella n'è betg resistenta a la schelira. Er il corpus da la punt è en in nausch stadi architectonic.

En il rom dal project construescha l'Uffizi da construcziun bassa ina nova punt d'ina lunghezza da var 80 meters sco er numerus novs mirs da pais. Er il trassé da la via da Sursaissa vegn curregì. Sin giavisch da la vischnanca cumpiglia la correcziun da la via plinavant in nov passape per lung da l'entir territori dal project ed il spustament da las fermadas da bus (che sa chattan lura da nov a l'entrada da Tobel). Dal rest duain las fermadas vegnir construidas da nov en tuttas duas direcziuns uschia, ch'il bus na po betg vegnir surpassà, cura ch'el sa ferma. Ils custs totals dal project importan circa 8,9 milliuns francs. Ils custs che resultan a la vischnanca da Sursaissa Mundaun per las fermadas da bus e per il passape èn budgetads cun circa 1 milliun francs.
Obersaxenstrasse

La Regenza ha approvà il project d'exposiziun per la sanaziun da la punt dal St. Petersbach tranter las fracziuns Meierhof e Tobel sco er per la correcziun correspundenta da la via da Sursaissa.

Correcziun voluminusa da la via da Valzeina

La via da Valzeina tranter la fracziun Valzeina e la vischnanca da Grüsch na correspunda betg pli als basegns actuals ed a las pretensiuns da segirezza d'ozendi d'ina via chantunala da colliaziun. La surstructura è donnegiada, perquai ch'ella n'è betg resistenta a la schelira, ed uschia è er defurmà il vial. Pervia da quai sto la via vegnir sanada. La Regenza ha approvà in project correspundent per sanar la via tranter Geissgaden e Boden sco er tranter Egga e l'entrada dal vitg da Valzeina. Ils custs totals da quest project voluminus importan var 15,82 milliuns francs. Tras la realisaziun dal project vegn augmentada la segirezza dal traffic e dal manaschi da la via da colliaziun e meglierada la circulaziun dal traffic. Plinavant gidan las mesiras previsas ad optimar il mantegniment da la via ed il servetsch d'enviern.

Valzeinastrasse

La via da Valzeina tranter la fracziun Valzeina e la vischnanca da Grüsch na correspunda betg pli als basegns actuals ed a las pretensiuns da segirezza d'ozendi d'ina via chantunala da colliaziun.

Glisch verda per ina nova surbajegiada a Zizers

La Regenza ha approvà la revisiun parziala da la planisaziun locala che la vischnanca da Zizers ha concludì ils 13 da favrer 2022. Uschia vegnan stgaffidas las basas da la planisaziun d'utilisaziun per ina surbajegiada d'auta qualitad en il quartier «Stiftbungert». Resguardond la situaziun sensibla da l'architectura locala vegnan stgaffidas las premissas per in territori da svilup attractiv sin la parcella da var 8800 meters quadrat. Per quest intent vegn ina zona d'abitar transfurmada en ina zona specifica dal center «Stiftbungert». Plinavant vegn l'obligaziun existenta da far in plan da quartier «Stiftbungert» remplazzada tras ina nova obligaziun da far in plan da quartier «Stiftbungert West».

OP-Revision Zizers

© Comet Photoshopping GmbH, Dieter Enz

La Regenza ha approvà la revisiun parziala da la planisaziun locala che la vischnanca da Zizers ha concludì ils 13 da favrer 2022.

Projects da votaziun dals 25 da settember 2022

La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia, ils 25 da settember 2022:

  • Iniziativa dal pievel dals 17 da settember 2019 «Na a l'allevament intensiv en Svizra (Iniziativa davart l'allevament intensiv)»
  • Conclus federal dals 17 da december 2021 davart la finanziaziun supplementara da la AVS tras in augment da la taglia sin la plivalur
  • Midada dals 17 da december 2021 da la Lescha federala davart l'assicuranza per vegls e survivents (LAVS) (AVS 21)
  • Midada dals 17 da december 2021 da la Lescha federala davart la taglia anticipada (LTA) (rinforzament dal martgà da chapital ester)

Sin plaun chantunal n'èn previs nagins projects da votaziun per ils 25 da settember 2022.

Sin plaun chantunal n'èn previs nagins projects da votaziun per ils 25 da settember 2022.

Neuer Artikel
Responsabladad: Regenza