Il chantun Grischun reagescha sin ils ultims cas d'animals stgarpads tras il triep dal Beverin. Perquai ha el dà la permissiun da sajettar dus animals giuvens da quest triep che dat en egl pervia da ses cumportament. La mesemna saira aveva il triep attatgà per la segunda giada ina vatga-mamma sin la Muntogna da Schons, questa giada sin l'Alp Nera. La vatga era vegnida blessada uschè fitg, ch'ella ha stuì vegnir durmentada. L'Uffizi federal d'ambient ha approvà la sajettada da dus animals giuvens dal triep dal Beverin. Il chantun ha vinavant la finamira d'allontanar l'entir triep e da sajettar – en il rom da l'urden giuridic svizzer – il luf-bab M92 che ha in cumportament spezialmain problematic.

L'incident ch'è capità la mesemna saira dals 13 da fanadur 2022 è il segund cas entaifer paucs dis, nua che lufs han attatgà ina vatga creschida. L'emna passada è vegnida mazzada ina vatga-mamma. Ussa è in animal vegnì blessà uschè fitg, ch'el ha stuì vegnir durmentà. Tuttas duas attatgas han pudì vegnir attribuidas al triep dal Beverin. Ellas mussan ch'il triep sviluppa in cumportament preoccupant, e qua ston ins reagir.

Per pudair regular ils trieps da lufs tras sajettadas prescriva il dretg federal ch'i saja vegnida surpassada ina limita da donns e ch'il triep respectiv haja survegnì pitschens. La limita da donns era gia cuntanschida avant ils dus incidents actuals. Ussa datti indizis concrets ch'il triep dal Beverin haja survegnì pitschens quest onn. Sco mesira immediata urgenta per spaventar ils lufs e per rinforzar il cumbat cunter donns e cunter dischavantatgs per l'agricultura, per il turissem e per la populaziun locala, ha il schef dal Departament d'infrastructura, energia e mobilitad (DIEM) ussa ordinà da sajettar dus animals giuvens dal triep. La mesira vegn sustegnida da l'Uffizi federal d'ambient (UFAM).

Ulteriuras mesiras èn necessarias
Il chantun vegn a s'engaschar cun tutta forza, per che ulteriuras sajettadas da regulaziun sajan pussaivlas tant pli svelt. En spezial vul el er mazzar il luf-bab M92, perquai che ses cumportament è il motiv per las attatgas. En il rom da l'urden giuridic svizzer vul el la finala plinavant laschar allontanar l'entir triep dal Beverin. La libertad d'agir dal chantun ha dentant limitas giuridicas (legislaziun federala da chatscha; directivas da l'Uffizi federal d'ambient; applitgabladad da la clausula generala da polizia). Considerond il dumber actual da lufs e resguardond ch'ils lufs sviluppan differents cumportaments, pretenda il chantun Grischun perquai er da princip la pussaivladad giuridica d'allontanar singuls trieps problematics. Il chantun vegn a s'engaschar decididamain per questa chaussa er en il rom da las revisiuns da las leschas e da las ordinaziuns iniziadas sin plaun federal.

Infurmaziuns:

• Dr. Mario Cavigelli, schef dal Departament d'infrastructura, energia e mobilitad dal Grischun, tel. +41 81 257 36 01, e‑mail Mario.Cavigelli@diem.gr.ch
• Dr. Adrian Arquint, manader da l'Uffizi da chatscha e pestga dal Grischun, tel. +41 81 257 38 92, e‑mail Adrian.Arquint@ajf.gr.ch

Responsabladad: Uffizi da chatscha e pestga