En il rom d'ina planisaziun d'eventualitads sa prepara il chantun per in'eventuala situaziun da mancanza d'electricitad e da gas. Per quest intent nominescha el il stab parzial «Segirezza dal provediment d'energia» dal Stab directiv chantunal. Quel surpiglia la coordinaziun cun la Confederaziun, cun ils gremis naziunals, cun la branscha d'energia e cun las vischnancas.
La reducziun da las furniziuns da gas russ en l'Europa restrenscha il provediment d'energia en l'entira Europa Centrala. Ultra da l'utilisaziun dal gas sco energia per stgaudar vegnan numnadamain grondas quantitads da gas transfurmadas termicamain en forza electrica en l'Europa. Perquai èsi da far quint, che la producziun d'electricitad vegnia a sa reducir en ils pajais pertutgads. Medemamain è actualmain ord funcziun ina part considerabla da las ovras nuclearas en Frantscha. Quai ha l'effect che la producziun d'electricitad en l'Europa vegn reducida ulteriuramain. Pertutgadas èn pia las capacitads da producir electricitad e las quantitads d'electricitad en pajais vischins ch'èn – particularmain durant ils mais d'enviern – impurtants per l'import d'electricitad en Svizra. La pitschna quantitad da precipitaziuns durant l'enviern passà e la setgira actuala en Svizra pudessan plinavant chaschunar, ch'i pudess er vegnir producì damain electricitad indigena da forza idraulica. Tut questas circumstanzas pon manar ad ina situaziun da mancanza d'electricitad e da gas. Sin plaun federal vegnan ils svilups observads cun attenziun ed analisads cuntinuadamain, quai ensemen cun differents gremis e cun differentas organisaziuns sco er integrond ils chantuns. Las experientschas obtegnidas furman ina basa per examinar e per instradar mesiras er dal chantun.
Incumbensar il stab parzial «Segirezza dal provediment d'energia» dal Stab directiv chantunal
Per pudair far frunt a las pretensiuns potenzialas futuras, incumbensescha la Regenza il stab parzial «Segirezza dal provediment d'energia» dal Stab directiv chantunal sut la direcziun da l'Uffizi da militar e da protecziun civila (UMPC) da cumenzar cun sias lavurs, respectivamain da cuntinuar cun las lavurs currentas. En quest stab parzial èn represchentads tut ils posts da servetsch da l'administraziun chantunala ch'èn pertutgads da questa dumonda. La direcziun spezialisada ha l'Uffizi d'energia e da traffic (UEnTr).
Coordinaziun cun la Confederaziun, cun ils gremis naziunals, cun la branscha d'energia e cun las vischnancas
La responsabladad principala per dumagnar la situaziun potenziala futura d'ina mancanza d'electricitad e da gas ha la Confederaziun. L'Organisaziun naziunala per il provediment d'electricitad en situaziuns extraordinarias (OSTRAL) vegn engaschada ed incumbensada da l'Uffizi federal per il provediment economic dal pajais (UFPE). La Cumissiun federala per l'electricitad (ElCom) è involvida pertutgant las dumondas dal provediment d'electricitad e dal svilup dal martgà d'electricitad. Per la situaziun d'ina mancanza da gas nominescha l'Associaziun svizra da l'industria da gas actualmain in'organisaziun d'intervenziun en cas da crisa, er quai per incumbensa da la Confederaziun (UFPE). Il stab parzial «Segirezza dal provediment d'energia» sto coordinar sin plaun chantunal las incumbensas ch'èn vegnidas fixadas da la Confederaziun e da ses gremis e realisar talas en collavuraziun cun la branscha d'energia, cun las vischnancas e cun ulteriuras partidas participadas.
Infurmaziun a la populaziun, a l'economia ed a las vischnancas
En secturs cumplexs dal provediment d'energia gioga l'infurmaziun ina rolla centrala. Per garantir ina svelta infurmaziun da la populaziun e da l'economia, vegn – analogamain a la plattafurma d'infurmaziun da COVID – elavurada actualmain ina plattafurma da communicaziun. Quella duai vegnir publitgada ed administrada sin in termin posteriur. Questa plattafurma duai alura servir per distribuir tut las infurmaziuns relevantas a la populaziun ed a las interpresas grischunas. La communicaziun cun las vischnancas vegn garantida sur il UMPC en la furma ch'è sa cumprovada.
Agiunta:
Preschentaziun da la conferenza da medias
Infurmaziuns:
- Cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
- Martin Bühler, manader da l'Uffizi da militar e da protecziun civila, schef SDC, tel. +41 81 257 35 22, e-mail Martin.Buehler@amz.gr.ch
- Thomas Schmid, manader da l'Uffizi d'energia e da traffic, tel. +41 81 257 36 21, e-mail Thomas.Schmid@aev.gr.ch
Responsabladad: Stab directiv chantunal