Navigation

Inhaltsbereich

  • Erste Mitteilung
  • Neuen Beitrag einfügen
La Regenza conceda als Servetschs psichiatrics dal Grischun ina contribuziun d'investiziun supplementara al nov edifizi da la Clinica per psichiatria d'uffants e da giuvenils. Ultra da quai stgaffescha ella las premissas da la planisaziun dal territori per la «Tur dals pastiziers» a Mulegns e per in project da glamping a Laax.

Contribuziun chantunala supplementara per la nova Clinica per psichiatria d'uffants e da giuvenils

La Regenza conceda als Servetschs psichiatrics dal Grischun (SPGR) ina contribuziun d'investiziun supplementara da 9,8 milliuns francs al nov edifizi da la Clinica per psichiatria d'uffants e da giuvenils. Per quest import dumonda ella il Cussegl grond per in credit d'impegn correspundent. 

Dapi l'introducziun da la nova finanziaziun dals ospitals l'onn 2012 na vegnan da princip betg pli pajadas contribuziuns d'investiziun separadas als ospitals ed a las clinicas. Las investiziuns ston vegnir finanziadas a lunga vista ord ils retgavs regulars dals assicuraders e dal maun public per las prestaziuns medicinalas ch'èn vegnidas furnidas. Dapi l'avertura da la staziun per tractaments staziunars da giuvenils n'ha la fundaziun da la Psichiatria d'uffants e da giuvenils dal Grischun da quella giada betg pudì constituir reservas per ils custs per l'utilisaziun dal stabiliment. Dapi la nova finanziaziun dals ospitals pudessan talas reservas vegnir duvradas per la construcziun d'in edifizi nov. Las prescripziuns legalas scumondan ina finanziaziun traversala tras la psichiatria da persunas creschidas. In basegn surregiunal u en l'entir chantun resulta dal cler augment dals temps da spetga per tractaments psicologics e psichiatrics ambulants sco er staziunars d'uffants e da giuvenils en ils SPGR. Temps da spetga han in effect negativ per ils uffants e per ils giuvenils. Tras quai s'avanza numnadamain savens la sintomatica e s'entarda il return a la normalitad.

In edifizi nov cun tut en tut 21 plazzas staziunaras e 7 plazzas da clinica dal di duai a lunga vista far frunt a las relaziuns actualas. Tar il project general tutgan medemamain ina scola da clinica ed ina halla da gimnastica. La Clinica per la psichiatria d'uffants e da giuvenils duai star a disposiziun a persunas minorennas cun ina diagnosa psichiatrica (suspectada) e cun il basegn da stuair vegnir ospitalisadas temporarmain. Ils custs totals dal project importan circa 33 milliuns francs. Cun prender en funcziun il nov edifizi da clinica planisà po d'ina vart vegnir terminada la staziun serrada provisorica cun tschintg letgs per giuvenils en la chasa da persunal da la clinica e da l'autra vart pon uffants e giuvenils, ch'èn oz per motivs da capacitad plazzads en clinicas extrachantunalas, vegnir tractads en il chantun Grischun.

Visualisierung Jugendpsychiatrie Visualisierung Jugendpsychiatrie

© Servetschs psichiatrics dal Grischun

La Regenza conceda als Servetschs psichiatrics dal Grischun (SPGR) ina contribuziun d'investiziun supplementara da 9,8 milliuns francs al nov edifizi da la Clinica per psichiatria d'uffants e da giuvenils. 

Vorschaubild Jugendpsychiatrie

Las premissas per la «Tur dals pastiziers» a Mulegns èn stgaffidas

La Nova Fundaziun Origen planisescha a Mulegns in object cultural che prevesa tranter auter l'installaziun d'ina tur cun in'autezza da 30 meters – l'uschenumnada «Tur dals pastiziers». Per la realisaziun dal project dovri dentant in'adattaziun dal plan da zonas da la vischnanca da Surses, per che las premissas da la planisaziun dal territori per edifizis e per stabiliments culturals temporars en il center dal vitg da la fracziun da Mulegns sajan dadas. La Regenza ha ussa approvà la revisiun parziala da la planisaziun locala che las votantas ed ils votants da la vischnanca avevan già concludì, e stgaffescha uschia la segirezza da planisaziun e la segirezza giuridica per realisar il project cultural planisà.

Il sectur d'utilisaziun per edifizis temporars en il center dal vitg da Mulegns è limità a tschintg onns. Suenter quest temp sto la «Tur dals pastiziers» planisada puspè vegnir demontada. Il maletg dal lieu da Mulegns vegn uschia influenzà mo temporarmain tras la construcziun da la tur. En il plan general da furmaziun èn plinavant definids il sectur da parcadi ed ina lingia da construcziun da la Tur dals pastiziers.

Mulegns
© Hansmeyer/Dillenburger

La Nova Fundaziun Origen planisescha a Mulegns in object cultural che prevesa tranter auter l'installaziun d'ina tur cun in'autezza da 30 meters – l'uschenumnada «Tur dals pastiziers».

Glisch verda per il «project da glamping» a Laax

La Regenza ha approvà la revisiun parziala da la planisaziun locala che la vischnanca da Laax aveva concludì. Cun quai ha ella stgaffì las premissas planisatoricas per la realisaziun d'in campadi temporar en il territori da l'Alp Nagens.

Il «project da glamping» duai mintgamai vegnir offrì durant ils mais da stad per promover il turissem da stad. Ultra da las tendas èn previsas sulettamain construcziuns mobilas che vegnan demontadas cumplettamain mintgamai la fin da la stad. La revisiun da la planisaziun locala cumpiglia ina surfatscha da 5364 meters quadrat ed è situada en la proxima vischinanza da l'edifizi da l'Alp Nagens en il sectur da skis da l'Arena Alva. Il lieu è cuntanschibel cun il bus pendular da Nagens che va directamain sin l'alp e l'accessibladad dal lieu è uschia ideala. «Glamping» è ina furma da campar glamurusa. Ins na dovra nagin agen equipament per campar ed ins pernottescha en alloschis fitg confortabels e per il pli extraordinaris amez la natira. 

OP-Revision Laax

© Bundesamt für Landestopografie 

La Regenza ha approvà la revisiun parziala da la planisaziun locala che la vischnanca da Laax aveva concludì. 

Neuer Artikel
Responsabladad: Regenza