Per la quarta giada han ins duvrà questa primavaira dronas cun cameras termicas per salvar ansiels-chavriel sin grondas surfatschas. Grazia al grond engaschament da las chatschadras e dals chatschaders grischuns sco er da las puras e dals purs han ins uschia pudì chattar 552 chavrielins novnaschids ed als salvar d'ina eventuala mort tras la maschina da segar. Quai èn var 85 ansiels-chavriel dapli che l'onn avant ch'era gia stà in onn da record.

Danovamain han las chatschadras ed ils chatschaders grischuns sco er las puras ed ils purs prestà in engaschament impurtant per salvar ils ansiels-chavriel. Da la fin da matg fin il cumenzament da fanadur èn vegnids fatgs circa 1720 sgols. Quai èn var 400 dapli che l'onn 2021. Cun 552 ansiels-chavriel salvads en l'entir chantun è quai fin ussa la stagiun da salvament d'ansiels-chavriel che ha gì il pli grond success. Quest grond dumber han ins pudì cuntanscher mo grazia a l'engaschament nunstanclentaivel da bleras pilotas e da blers pilots da dronas motivads.

Sgular vinavant sin in aut nivel
En l'entir Grischun èn en gir da mez matg fin mez fanadur var 190 pilotas e pilots en l'interess dals ansiels-chavriel – quai adina la damaun baud u la saira tard. Mintga di da segar èn en acziun tut en tut 24 dronas en quasi tut las regiuns dal Grischun. L'aut nivel da success ch'è resultà en il fratemp duai vegnir mantegnì er l'onn che vegn, e quai cun l'intenziun da gudagnar anc dapli pilotas e pilots sco er gidantras e gidanters per il salvament dals ansiels-chavriel.

Las persunas necessarias vegnan recrutadas per gronda part da las secziuns da chatschaders da las regiuns pertutgadas. Tut tenor la regiun vegnan las acziuns coordinadas da las secziuns, da la surveglianza da chatscha cumpetenta ensemen cun la pura u il pur, ubain che las secziuns procedan en atgna reschia. Aposta per quest intent han las chatschadras ed ils chatschaders endrizzà in servetsch da pichet. Senza la prontezza da las chatschadras e dals chatschaders e senza la collavuraziun cun las puras ed ils purs na pudess il project betg vegnir realisà. Proxima primavaira duain danovamain vegnir offrids curs da perfecziunament per promover vinavant il salvament dals ansiels-chavriel.

Infurmaziuns:

• Regula Bollier, Uffizi da chatscha e pestga dal Grischun, tel. +41 81 257 21 66 (cuntanschibla fin las 12.00), e-mail Regula.Bollier@ajf.gr.ch
• Toni Hofmann, president da la Tgira da la selvaschina da l'Uniun grischuna da chatschaders da patenta (UGCP), tel. +41 79 690 84 81, e-mail duchliranch@bluewin.ch

Responsabladad: Uffizi da chatscha e pestga