Sin trais alps da nursas sin il territori communal da Claustra èn vegnidas mazzadas 60 nursas e blessadas 15 ulteriuras nursas questa stad tras attatgas da lufs. Malgrà ch'ina alp è vegnida stgargiada anticipadamain, resta il potenzial da donns sin las autras alps sin in aut nivel. Per impedir ulteriurs donns ha il chantun disponì da sajettar in luf a partir dal 1. da settember.
Sin trais alps da nursas sin il territori communal da Claustra èn vegnids stgarpads passa 10 animals da niz a chaschun da totalmain 15 attatgas en situaziuns protegidas. Tenor la legislaziun federala da chatscha è uschia surpassada la limita da donns per sajettar in luf. Ils donns èn vegnids chaschunads presumtivamain da dus lufs. Igl è cumprovà geneticamain che quests dus lufs avevan stgarpà gia durant la stad 2021 divers animals da niz sin questas alps. I sa tracta d'in animal feminin e d'in animal masculin.
La preschientscha confermada d'in luf feminin premetta ch'i vegnia examinà minuziusamain avant la sajettada, sch'igl è eventualmain sa furmà in triep. La cumprova d'ina reproducziun da lufs vegn normalmain fatga durant ils mais da fanadur e d'avust. Malgrà in monitoring pli intensiv n'èn vegnids constatads en quest cas nagins lufs giuvens durant quest temp. Ina furmaziun d'in triep n'è pia strusch probabla ord vista da la biologia da selvaschina. Per impedir ulteriurs donns ha il chantun perquai disponì da sajettar in luf singul a partir dal 1. da settember. Tenor las prescripziuns da la lescha vala la permissiun da sajettar per 60 dis.
L'execuziun da la sajettada croda en il temp da la chatscha auta grischuna e da la chatscha grischuna da capricorns ed è perquai anc pli pretensiusa. Durant questas duas chatschas è la surveglianza chantunala da chatscha occupada intensivamain cun las incumbensas spezialas ch'èn da liquidar. Per exequir la sajettada dal luf sa resalva il chantun perquai il dretg da betg mo revegnir a las collavuraturas ed als collavuraturs da l'Uffizi da chatscha e pestga, mabain eventualmain er da nominar e d'engaschar explicitamain chatschadras e chatschaders per quest intent.
Cuntinuar cun il monitoring
La surveglianza da chatscha tegna vinavant en egl activamain e passivamain il territori presumtiv dals lufs. Plinavant vegnan las chatschadras ed ils chatschaders locals supplitgads d'annunziar tut las observaziuns da lufs a la surveglianza da chatscha. En cas d'ina eventuala conferma da lufs giuvens revochescha il chantun la disposiziun da sajettar il luf ed inoltrescha a l'Uffizi federal d'ambient (UFAM) ina dumonda da regulaziun.
Infurmaziuns:
Dr. Adrian Arquint, manader da l'Uffizi da chatscha e pestga, tel. +41 81 257 38 91 (cuntanschibel tranter las 10.00 e las 12.00), e-mail Adrian.Arquint@ajf.gr.ch
Responsabladad: Departament d'infrastructura, energia e mobilitad