Navigation

Inhaltsbereich

  • Erste Mitteilung
  • Neuen Beitrag einfügen

Sport multifar e varià, quai è la gronda finamira dal nov program polisportiv «0712 – Tut enturn il sport». Il program è vegnì lantschà da l'Uffizi per la scola populara ed il sport. El fa enconuschent a las scolaras ed als scolars da scola primara da 7 fin 12 onns – perquai il num – ina vasta paletta da disciplinas da sport e da furmas da moviment fundamentalas. Dapi l'avust han lieu ils emprims trenaments tar las organisaziuns participantas ed ina segunda scolaziun da manadras e manaders ha gia gì lieu.

Il program «0712» porscha duas giadas 35 lecziuns da sport che cumpiglian tut las furmas da moviment fundamentalas. Uschia èsi pussaivel d'offrir er a manadras e manaders cun damain experientscha multifara in trenament attractiv e varià. Tut las lecziuns èn cumpatiblas cun «Giuventetgna+Sport» e cun il Plan d'instrucziun 21 e pon pia vegnir realisadas directamain en l'uniun ed en scola. Quest potenzial han diversas organisaziuns percurschì e l'interess per «0712» è legraivlamain grond. 12 uniuns e scolas han gia cumenzà l'avust cun lur purschida polisportiva ed il program «0712» chatta buna accoglientscha tar scolas ed uniuns da l'Engiadina fin en la regiun Viamala e da la Surselva fin en il Partenz.

Scolaziun captivanta da «0712»
Tut las manadras ed ils manaders ch'èn activs per ina purschida da «0712» vegnan ordavant preparads tras ina scolaziun divertenta ed interessanta. Là vegnan ellas ed els famigliarisads cun il sistem, survegnan infurmaziuns davart las diversas pussaivladads da realisaziun e co ch'il program polisportiv po vegnir integrà en lur purschida. En spezial però vegnan las lecziuns rendidas pli enconuschentas ad ellas ed els. Uschia er dacurt a Cuira: 22 manadras e manaders motivads e mirveglius èn vegnids a savair en la halla da gimnastica Montalin directamain, tge che polisportivadad vul dir. Las duas manadras dal curs Ladina Ehrler-Scharplatz ed Isa Rest-Rivero han manà tras il suentermezdi e preschentà la multifariadad variada da las lecziuns «0712». Tuttas e tuts èn vegnids entusiasmads da las numerusas ideas, dals gieus e dals exercizis che las duas dunnas avevan mess ensemen sistematicamain. Da Ladina ed Isa – las fundaturas da «LaIsa Polysport» – è la sbrinzla d'entusiassem ida vi sin las participantas ed ils participants. «Las lecziuns èn top – bain structuradas, descrittas detagliadamain e multifaras. Las illustraziuns ed ils blers fegls supplementars na laschan avertas naginas dumondas. Simplamain grondius!», è intgantada ina participanta.

Visita en in trenament da «0712»
E co plascha «0712» als uffants? Ina visita en in trenament da «0712» a Trimmis in mais suenter il cumenzament mussa: Fitg bain! La secziun giuvna dal stgalim bass da l'uniun da gimnastica Trimmis survegn dapi la stad l'instrucziun tenor las lecziuns da «0712» e tant las manadras sco er ils uffants han plaschair dals gieus e dals exercizis cools e variads. I vegn currì, siglì, bittà e rampignà cun plain engaschament. Las manadras da «0712» Yvonne Kindschi e Sandra Uehli din lura er: «In trenament varià era gia impurtant avant 0712 – ussa avain nus però bleras inspiraziuns da 0712 per preparar l'instrucziun ed integrain uschia gieus ed exercizis ch'èn novs per tuttas e tuts. Quai fa plaschair als uffants e nus avain la tschertezza, ch'els èn dumandads e ch'els vegnan promovids.» A las manadras plaschi er spezialmain ch'ellas restan flexiblas cun realisar l'instrucziun, malgrà las prescripziuns, e ch'ellas pon per exempel mantegnair rituals cumprovads.

Constataziuns dal project da pilot
«0712» è vegnì testà durant l'emprim semester da l'onn da scola 2021/22 sco project da pilot en dus lieus en totalmain trais gruppas. Da l'enquista dals geniturs èsi oravant tut resortì, che bundant 60 pertschient tschernan sapientivamain ina purschida da sport multifara per lur uffant e ch'in ulteriur quart dals geniturs giavischa ina purschida da «tant l'in sco l'auter»: multifariadad e disciplinas da sport specificas. Ils uffants han apprezià la gronda variaziun – las manadras ed ils manaders han punctuà las lecziuns detagliadas ch'èn descrittas en moda chapaivla ed illustradas da maniera professiunala. Las enconuschientschas èn vegnidas integradas en la concepziun definitiva dal program. Il sustegn finanzial dal chantun per las organisaziuns participantas è per entant garantì fin l'onn 2025.

Ulteriuras infurmaziuns sut: www.0712.ch

Fotografia agiuntada:

Polysportprogramm 0712

Infurmaziuns:

  • Thierry Jeanneret, manader da la partiziun graubündenSport, Uffizi per la scola populara ed il sport, tel. +41 81 257 27 55, e‑mail Thierry.Jeanneret@avs.gr.ch
  • Andrea Niklaus, manadra dal program 0712, Uffizi per la scola populara ed il sport, tel. +41 81 257 31 02, e‑mail Andrea.Niklaus@avs.gr.ch


Responsabladad: Uffizi per la scola populara ed il sport

Neuer Artikel