Navigation

Inhaltsbereich

  • Erste Mitteilung
  • Neuen Beitrag einfügen

La segunda maisa radunda è passada: oz suentermezdi èn represchentantas e represchentants da la Confederaziun, dals chantuns, da las regiuns e da las vischnancas sa radunads per tractar il tema dal traffic da guntgida da la A13 e da la A28. En il center èn stadas las emprimas enconuschientschas da l'emprova da pilot da la stad 2022 sco er la realisaziun d'ulteriuras mesiras – er en vista al traffic d'enviern.

En il rom d'ina emprova da pilot sur ils firads e durant las fins d'emna da la stad 2022 cun il pli bler traffic èn las vias da transit tras las vischnancas da Panaduz e da Razén vegnidas dadas libras mo a las abitantas ed als abitants, als servetschs d'apport sco er al traffic public. Quai cun la finamira da distgargiar ils vitgs dal traffic da guntgida e da tegnair liber ils centers dals vitgs (communicaziun a las medias dals 29 da mars 2022 e communicaziun a las medias dals 15 da fanadur 2022).

Las serradas funcziunan mo per part
En il rom da la maisa radunda dad oz hai dà in impurtant barat d'experientschas. Las emprimas experientschas mussan che las mesiras prendidas han funcziunà mo per part. Ils vitgs ch'èn pertutgads il pli ferm, han bain constatà main traffic. Dentant hajan ins sentì, tge dis che las sortidas da l'autostrada na sajan betg mo stadas signalisadas, mabain er vegnidas controlladas da persunal che haja puspè manà las automobilistas ed ils automobilists enavos sin la via naziunala. Sulettamain la signalisaziun che la via da transit tras ils vitgs saja serrada, n'haja betg bastà e n'haja betg purtà ina gronda distgargia senza questa mesira da sustegn. Per realisar questas mesiras dovri dentant bler persunal. Ultra da quai chaschunan las mesiras anc pli grondas colonnas sin l'autostrada ed il traffic da guntgida vegn extendì sin ulteriuras vischnancas pertutgadas.

Traffic d'enviern porta novas sfidas
In ulteriur punct central da la maisa radunda è stada la tematica dal traffic d'enviern. Pertutgads il pli fitg da quai èn – tenor las experientschas ch'èn vegnidas fatgas fin ussa – il traject sut da la A28 cun las vischnancas da Schiers, Grüsch, Jenaz e Landquart sco er la citad da Cuira e las vischnancas da Trimmis e da Zizers. In volumen da traffic pli grond è da spetgar qua cunzunt durant sis fin set fins d'emna da la fin da december fin la fin da favrer u fin il cumenzament da mars. Quai dependa dentant fitg ferm da l'aura, uschia ch'igl è per il mument fitg difficil da far prognosas exactas.

Optimaziun e cuntinuaziun da las mesiras a partir da la primavaira 2023
Sur ils firads e durant la stad 2023 duain vegnir optimadas e puspè vegnir realisadas las mesiras gia prendidas. Ultra da quai vegnan elavuradas differentas mesiras a media ed a pli lunga vista.

Chattar soluziuns cun tut las parts participadas
A la segunda maisa radunda èn stads represchentads supplementarmain las vischnancas pertutgadas dal Partenz sco er il chantun Son Gagl. Las soluziuns cumplessivas pussaivlas che vegnan prendidas en mira pretendan numnadamain in sguard sur il cunfin chantunal. Er suenter la segunda maisa radunda èsi dentant cler: I na dat actualmain nagina soluziun ideala, pertge che mintga mesira realisada ha novas consequenzas. Che eventuals problems vegnian uschia mo spustads, vulan tut las parts participadas impedir uschè bain sco pussaivel.

Ulteriurs pass suondan
Ils emprims pass en la dretga direcziun èn fatgs. Quai ha mussà er la discussiun averta e constructiva tranter las represchentantas ed ils represchentants da la Confederaziun, dals chantuns, da las regiuns e da las vischnancas a chaschun da la segunda maisa radunda. En coordinaziun cun las datas registradas la stad vegnan ils resultats da la discussiun integrads en la planisaziun per l'enviern. Sin basa da quai vegnan examinads ulteriurs pass per distgargiar las regiuns e las vischnancas pertutgadas er a media ed a lunga vista. Plinavant vegnan ussa elavuradas pli detagliadamain ulteriuras mesiras per l'enviern da pilot 2022/2023.

Infurmaziuns:

  • Reto Knuchel, inschigner chantunal, Uffizi da construcziun bassa dal Grischun, tel. +41 81 257 37 01, e-mail Reto.Knuchel@tba.gr.ch
  • Andreas Pöhl, manader Gestiun dal traffic, Uffizi da construcziun bassa dal Grischun, tel. +41 81 257 37 62, e-mail Andreas.Poehl@tba.gr.ch


Responsabladad: Uffizi da construcziun bassa

Neuer Artikel