A las duas interpresas Inside Labs SA da Laax e Spot Werbung Pircher Cantoni SA da San Murezzan garantescha la Regenza ina contribuziun chantunala da maximalmain 970 000 francs per lur project digital cuminaivel «Software per ecosistems digitals – dal Grischun per il turissem». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Il project è budgetà cun circa 3,23 milliuns francs.

Las duas interpresas da digitalisaziun Inside Labs e Spot Werbung s'occupan dapi onns da grondas destinaziuns sco Engiadina San Murezzan, Flem Laax, Tavau Claustra u Arosa Lai. Cun ina nova soluziun da software ch'è accessibla per tut las destinaziuns turisticas grischunas duain vegnir furnids en l'avegnir ils dretgs products il dretg mument als dretgs giasts. L'applicaziun scalabla creescha uschia in ecosistem per l'interacziun da las destinaziuns cun ils furniturs da prestaziun e cun lur giasts. A las destinaziuns turisticas manca oz la dretga schelta da tools per pudair crear aventuras digitalas per lur giasts ed uschia generar avantatgs da concurrenza per sasezzas e per ils furniturs da prestaziun da la destinaziun. Pervia da quai perdan las destinaziuns actualmain blera clientella ad interpresas ch'èn activas sin plaun internaziunal.

A tut las regiuns turisticas dal chantun dat il project la pussaivladad da realisar pli svelt la transfurmaziun digitala. Pervia da la structura dal project restan la valurisaziun e las datas registradas plitost en il Grischun ed en Svizra. La colliaziun directa cun la clientella vegn uschia recuperada ed il turissem grischun po restar cumpetitiv a lunga vista.

La Regenza ha approvà il project da via per meglierar e per sanar cunter canera la via d'Engiadina tranter la punt Son Valentin e Tschern. Il traject da via d'ina lunghezza da circa 3,5 kilometers sco er ils mirs simpels ed ils mirs da sustegn èn per part en in nausch stadi architectonic. Ultra da quai manca per gronda part ina chinetta da la vart da la val. L'ur da la via na po pervia da quai betg pli supportar la chargia dals vehichels grevs.

En il rom dal project vegnan tranter auter construids in profil traversal da la via ch'è confurm a las normas ed i vegn renovada la structura da la via, quai per pudair garantir la capacitad da chargia da la via ed augmentar il confort da viagiar. Ultra da quai vegnan las construcziuns da sustegn existentas e manglusas renovadas respectivamain cumplettadas. A medem temp sanescha la vischnanca da Scuol il sutpassadi donnegià La Fuorcha e l'access a Sur En. Ils custs totals dal project importan circa 20,5 milliuns francs.

. 

La Regenza ha approvà dus projects da rempars d'auals a Lantsch. En la Val Tgietschen ed en la Val Runcalatsch datti auals activs che pon chaschunar bovas. Ils dus auals naschan al Piz Linard e s'avischinan la finala al territori dal vitg da Lantsch. Per proteger ils abitadis ed ils stabiliments d'infrastructura han ins cumenzà gia avant passa 100 onns a construir sistematicamain rempars sin ils trajects respectivs. Dapi lura èn ils dus sistems da rempars vegnids engrondids e renovads periodicamain. In'analisa da las ristgas actualas ha mussà, ch'igl exista in deficit da segirezza, e quai malgrà ils rempars existents. Per quest motiv ha la vischnanca da Lantsch decidì da realisar quests dus projects.

Il project d'engrondiment per il rempar da la Val Tgietschen prevesa d'amplifitgar il volumen da retegn dal collectur da glera existent sin 7000 fin 9000 meters cubic. Ultra da quai duai il letg da l'aual sut il collectur vegnir engrondì sin ina lunghezza da circa 130 meters. Ils custs totals da quest project èn budgetads cun 2,6 milliuns francs. Tenor la cunvegna da program da la NGF (nova gulivaziun da finanzas) en il sectur «ovras da protecziun cunter l'aua» sa participeschan il chantun e la Confederaziun cun maximalmain 1,43 milliuns francs.

Per il rempar da la Val Runcalatsch vegn – en il rom dal project – auzada la via da guaud dasper l'aual, uschia ch'ella furma in rempar da deviaziun en cas d'inundaziuns. Ultra da quai vegn il lieu da distatga serrà cun in rempar da terra, per evitar la distatga da bovas sur il collectur da glera existent. Dals custs totals da var 2,02 milliuns francs surpiglian il chantun e la Confederaziun tenor la cunvegna da program da la NGF maximalmain var 1,11 milliuns francs. Il chantun sa participescha supplementarmain cun ina contribuziun per la construcziun da vias da 909 000 francs.

La Regenza ha approvà la revisiun parziala da la planisaziun locala ch'il cussegl communal da la vischnanca da Mustér ha approvà ils 25 da mars 2022. Uschia stgaffescha ella las premissas da la planisaziun d'utilisaziun per la construcziun d'ina punt pendenta dal vitg da Mustér a la fracziun da Mumpé Medel. Cun l'ovra da construcziun planisada duai vegnir stgaffida ina colliaziun directa sur il Rain per las pedunas ed ils peduns. Ultra da quai duai la punt pendenta vegnir duvrada per intents turistics.

La chavorgia dal Rain tranter Segnas e Fontanivas è in impurtant quartier d'enviern per differentas spezias d'animals selvadis (en spezial tschiervs, chavriels e chamutschs). Actualmain vegn il territori per part er visità durant l'enviern da viandantas e viandants sco er da curriduras e curridurs da gianellas, quai che chaschuna situaziuns da disturbi en quest spazi da viver delicat. La punt pendenta planisada duai porscher in'alternativa attractiva a la via da colliaziun tras la chavorgia.

© Comet Photoshopping GmbH, Weisslingen