A Poschiavo è vegnì avert oz il segund center administrativ regiunal sin territori chantunal italofon. Tut en tut è quai l'otgavel center en il Grischun. Sis posts da servetsch chantunals cun 17 plazzas da lavur sa chattan da nov sut in unic tetg.
La strategia chantunala d'immobiglias prevesa en l'entir Grischun tut en tut nov centers regiunals en lieus ch'èn gia ussa centers administrativs. Ils centers a Glion, Roveredo, Tusaun, Scuol, Tavau, Landquart e Cuira èn gia en funcziun ed èn sa cumprovads en la pratica. Suenter l'avertura dal center administrativ a Poschiavo vegni cuntinuà cun la planisaziun e cun la realisaziun dal center a Samedan. Plinavant èsi previs d'elavurar las basas per in'eventuala segunda etappa da la «sinergia» a Cuira.
A Poschiavo èn sis posts da servetsch chantunals, ch'eran repartids sin differents lieus, vegnids concentrads en in nov edifizi administrativ cun var 17 plazzas da lavur. Quai èn l'Uffizi regiunal dal servetsch social Bernina, la Cussegliaziun da scola e d'educaziun, l'Inspecturat da scola, il Center regiunal per intermediaziun da lavur CIL, la Cussegliaziun da professiun, da studi e da carriera sco er la Polizia chantunala. Grazia a la concentraziun èsi pussaivel da trair a niz sinergias impurtantas e da spargnar custs.
Edifizi administrativ nov e modern
Il nov center sa chatta en in lieu central a la Via da Spultri, e quai en in edifizi che vegniva duvrà pli baud dal Corp da guardias da cunfin. Pervia dal grond potenzial areguard las relaziuns da spazi è l'immobiglia adattada fitg bain sco edifizi administrativ. Il chantun ha perquai prendì en locaziun l'entir edifizi e fatg in contract da locaziun a lunga vista cun la Confederaziun.
Per il diever administrativ èsi stà necessari da modifitgar l'edifizi. Las surfatschas èn vegnidas adattadas als basegns dals posts da servetsch sco er als standards da spazi da l'administraziun chantunala. Las modificaziuns han gì la finamira da stgaffir biros moderns ch'èn fitg flexibels e libers d'obstachels. Ultra da concentrar las utilisaziuns e da realisar in concept da spazi modern èsi er stà pussaivel da reducir optimalmain las surfatschas en vista als custs e da meglierar l'attractivitad per la clientella.
Malgrà las adattaziuns necessarias ha la structura da l'edifizi pudì vegnir mantegnida tut en tut. Areguard la tecnica dal stabiliment han stuì vegnir adattadas en emprima lingia las installaziuns electricas existentas. Ellas èn vegnidas amplifitgadas cun lingias da communicaziun universalas.
Las lavurs da modificaziun èn vegnidas cumenzadas mez mars 2022. Grazia a la buna collavuraziun tranter la proprietaria, il patrun da construcziun, las utilisadras ed ils utilisaders, il team da planisaziun e las interpresas èn las finamiras dal project vegnidas cuntanschidas tant areguard la qualitad, areguard ils custs sco er areguard ils termins. Ils custs totals da las modificaziuns importan circa 600 000 francs.
Ils 5 da november 2022 ha lieu in di da las portas avertas per la populaziun interessada. Infurmaziuns detagliadas davart l'occurrenza vegnan communitgadas en las medias regiunalas.
Fotografias agiuntadas:
Il nov center administrativ regiunal a Poschiavo, fotografia da dador.
Foto 2, Foto 3, Foto 4, Foto 5, Foto 6
Infurmaziuns:
- Cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01 (cuntanschibel a partir da las 15.30), e-mail Mario.Cavigelli@diem.gr.ch
- Markus Dünner, architect chantunal, Uffizi da construcziun auta, tel. +41 81 257 36 31 (cuntanschibel a partir da las 13.00), e-mail Markus.Duenner@hba.gr.ch
Responsabladad: Uffizi da construcziun auta