La Regenza ha approvà l'affiliaziun da la gestiun dal register funsil da la vischnanca da Surses al circul da register funsil Alvra per il 1. da fanadur 2023.

Actualmain maina la vischnanca da Surses il register funsil cun in agen uffizi entaifer l'organisaziun communala (circul da register funsil Surses). Ils 26 da zercladur 2020 ha la vischnanca concludì da surdar la gestiun dal register funsil al circul da register funsil Alvra, che consista da las vischnancas d'Alvra, Bravuogn Filisur, Lantsch e Schmitten. Il circul da register funsil Alvra ha approvà questa affiliaziun respectivamain l'integraziun da la vischnanca da Surses cun il conclus circular dals 17 d'october 2022.

La Regenza ha approvà la revisiun parziala da la planisaziun locala che la vischnanca da Valragn aveva concludì il 1. da fanadur 2022. Uschia stgaffescha ella las premissas da la planisaziun d'utilisaziun per realisar l'engrondiment planisà dal tschaler da madiraziun da chaschiel da la chascharia da Nufenen. Per quest engrondiment vegn transferida – da la vart ost dal tschaler existent – ina surfatscha da var 208 meters quadrat da la zona d'agricultura a la zona dal vitg 1. A medem temp vegn transferida sin autras parcellas ina surfatscha da la medema grondezza da la zona dal vitg 1 a la zona d'agricultura.

© Comet Photoshopping GmbH / Dieter Enz