Ils dumbers da passagiers dal traffic public èn sa revegnids, suenter che la mobilitad era sa diminuida en consequenza da la pandemia da corona. Actualmain èn ils dumbers da passagiers sur il nivel da l'onn 2019. Parallelamain al tschessar da la pandemia èn plinavant sa midads ils basegns da mobilitad da las clientas e dals clients. Particularmain per il traffic da temp liber vegn duvrà pli savens il traffic public. Quest fatg ha procurà per ina stad da record per las interpresas da transport dal Grischun e contribuì er a la protecziun dal clima. Sin diversas lingias extenda il chantun Grischun perquai la purschida sin la midada da l'urari dals 11 da december 2022. Novas tecnologias gidan supplementarmain ad augmentar l'attractivitad dal traffic public. Latiers tutgan la nova tecnica da sparter ils trens che vegn utilisada cun ils novs trens dal tip Capricorn sco er l'introducziun dal sistem da vendita progressiv «Venda».
I dura mo anc paucs dis, fin che la regiun Viamala – e particularmain la vischnanca da center Tusaun – profitescha a partir dals 11 da december 2022 dal tact da mes'ura da la Viafier retica en direcziun da Cuira. «Cuira vegn pli datiers, nus daventain pli svelts» è la missiva principala da Hans-Andrea Fontana, il parsura da la Conferenza da las presidentas e dals presidents da la regiun Viamala. Da nov circulescha in RegioExpress tranter Cuira e Tusaun (davent da Cuira a las xx.28, davent da Tusaun a las xx.02) cun fermada a Domat, a Panaduz ed a Razén. Ensemen cun l'InterRegio che circulescha gia tranter Cuira e San Murezzan procura quel per in tact da mes'ura. Sco purschida d'introducziun stattan a disposiziun per l'emprima emna da circulaziun bigliets da spargn attractivs per tut ils novs RegioExpress da questa lingia, quai sin tut ils chanals da vendita online enconuschents (p.ex. sbb.ch).
Meglras e pli frequentas colliaziuns
Cuira sco punct central dal traffic na profitescha betg mo dal tact da mes'ura per Tusaun, mabain er da dapli colliaziuns en la Bassa. Las fins d'emna ed ils firads vegnan introducids il tact da mes'ura per l'InterCity tranter Turitg e Cuira sco er mintgamai dus pèrs da trens InterCity cun colliaziun directa per Berna, Losanna e Genevra. In schlargiament da la purschida datti er per las vischnancas d'aglomeraziun da Domat, Favugn e Trimmis. Domat profitescha gist trais giadas. Ultra da la fermada supplementara dal RegioExpress da la Viafier retica vegnan da nov colliads il quartier sid ed il parc industrial Vial tras il Bus da Cuira. Trimmis e Favugn survegnan colliaziuns bler pli frequentas per Cuira.
Pertutgant las colliaziuns fan er ulteriuras regiuns en il chantun in grond pass. Tranter quellas la regiun Alvra che survegn da nov in tact da mes'ura sin las pli impurtantas lingias, l'intschess da l'Arena Alva che profitescha d'ina extensiun da la purschida sco er las lingias da bus per Samignun e per Sursaissa. Las ulteriuras adattaziuns da l'urari vegnan resumadas en il document ch'è agiuntà a la communicaziun a las medias e pon vegnir consultadas supplementarmain sin las paginas d'internet fahrplanfelder.ch e fahrplan-ost.ch.
Novas tecnologias en acziun
Ina novaziun sin la rait da la Viafier retica è il manaschi da sparter ils trens tranter Landquart e San Murezzan respectivamain Tavau. Grazia ad in accuplament automatic po tar quest manaschi in tren vegnir spartì a dus trens respectivamain pon dus trens vegnir unids ad in tren. Il grond avantatg è quel, che duas differentas staziuns finalas pon vegnir cuntanschidas cun il medem tren e senza ch'ins sto midar tren. Per direcziun vegnan a cursar mintga di set trens che pon vegnir spartids, la fin d'emna otg da quests trens. Sin il traject tranter Landquart e Scuol-Tarasp vegnan da nov er duvrads ils trens moderns Capricorn.
Da nov vegn AutoDaPosta a partir da la primavaira 2023 ad utilisar en la Val dal Rain Grischuna tranter Bogn Ragaz e Cuira indesch bus electrics sin quatter lingias.
In'ulteriura novaziun è il sistem da vendita «Venda» ch'è cumplettamain digital. Per la midada da l'urari vegn quel introducì a Tavau. Las clientas ed ils clients pon da nov chargiar lur bigliet sin il Swisspass ubain sin ina carta da banca, sche la funcziun senza contact è activada. Pajà poi vegnir cun la carta u per quint. L'introducziun en la Vallada dal Rain Grischuna ha lieu il cumenzament dal 2023 ed en l'Engiadin'Ota (consorzi tariffar engadin mobil) la primavaira 2023. Las ulteriuras regiuns dal chantun vegnan equipadas cun «Venda» il cumenzament dal 2024.
Rinforzar las regiuns
Cun la realisaziun da l'engrondiment previs da las purschidas dal traffic public vegn augmentada l'attractivitad dal Grischun sco chantun d'abitar, da lavurar e da turissem. L'ulteriur meglierament da la purschida dal traffic public duai plinavant motivar la populaziun ed ils giasts da noss chantun da midar a furmas da mobilitad che schanegian il clima.
Fotografia:
Foto 2
Agiuntas:
Infurmaziuns:
- Cusseglier guvernativ dr. Mario Cavigelli, Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
- Thierry Müller, Leiter Abteilungmanader da la partiziun Traffic public, Uffizi d'energia e da traffic, Tel. +41 81 257 36 04, e-mail Thierry.Mueller@aev.gr.ch
Responsabladad: Uffizi d'energia e da traffic