A chaschun da l'onn presidial ha il president da la Regenza Marcus Caduff visità tut las 11 regiuns dal Grischun. En il center da questas visitas è mintgamai stà l'inscunter ed il barat cun las parsuras ed ils parsuras da las vischnancas, da las regiuns e da las federaziuns da branscha regiunalas.
Il president da la Regenza Marcus Caduff è stà spezialmain impressiunà da la diversitad e particularmain da las discussiuns adina proactivas ed engaschadas. Uschè multifar sco il chantun Grischun è, uschè multifaras èn er las regiuns, lur sfidas e lur perspectivas.
Las perspectivas da creschientscha en il center dals discurs
La dumonda da las perspectivas da creschientscha regiunalas fatschenta il chantun sco er las regiuns en medema maniera. Entant che tschertas regiuns sco Landquart u il Plaun han ina gronda creschientscha da la populaziun e da l'economia, vegnan autras regiuns sco l'Engiadina Bassa/Val Müstair, Malögia u la Surselva confruntadas cun svilups regressivs. Dals discurs cun las represchentantas ed ils represchentants da las regiuns è resultà, che questas cundiziuns differentas muntan grondas sfidas che ston vegnir prendidas per mauns en moda differenta.
La midada demografica preoccuppa
In quità han tut las regiuns: La midada demografica cuntinuescha en tut las regiuns. L'inveteraziun da la societad en il Grischun è avanzada pli fermamain che la media svizra. La midada demografica è in dals motors centrals da la mancanza da forzas da lavur e da persunas spezialisadas ch'exista en tut las branschas e regiuns dal chantun. En l'avegnir pudess questa mancanza daventar anc pli acuta, perquai ch'i manca il potenzial da forzas da lavur indigenas.
Vischnancas cun sfidas da la planisaziun dal territori
Er la planisaziun dal territori muventa las regiuns. Bleras vischnancas èn fatschentadas cun la revisiun da lur planisaziun locala. La realisaziun da l'emprima etappa da la revisiun da la Lescha davart la planisaziun dal territori (LPT 1) ha la finamira da franar l'extensiun da las zonas da construcziun en la cultira e da diriger il svilup dals abitadis vers anen. Las vischnancas spetga ina incumbensa enormamain pretensiusa: Ellas ston realisar las directivas da la LPT 1 ed uschia examinar lur reservas da zonas da construcziun sco er adattar quellas al svilup da la populaziun. Igl è ina chaussa difficila da limitar d'ina vart la destructuraziun e da cuntanscher da l'autra vart la finamira da las vischnancas da stgaffir avunda spazi d'abitar ch'è er pajabel.
Fotografia agiuntada:
Infurmaziuns:
President da la Regenza Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel fin las 11.00), e‑mail Marcus.Caduff@dvs.gr.ch
Responsabladad: Departament d'economia publica e fatgs socials