La Regenza na cumenza betg mo cun ina nova commembra e cun in nov commember l'onn nov, mabain er cun 94 finamiras multifaras, che duain vegnir cuntanschidas durant ils proxims mais. Ils puncts centrals dal program annual da quest onn èn la meglieraziun da l'attractivitad dal chantun sco patrun, la digitalisaziun, la construcziun d'in nov center da scola auta spezialisada, la tgira d'uffants cumplementara a la famiglia sco er la sanadad e l'energia.
Il program da la Regenza ed il plan da finanzas èn – tenor la Constituziun chantunala – ils instruments centrals da la gestiun strategica e politica dal chantun Grischun. Ensemen furman els la planisaziun da las prioritads da la Regenza a vista mesauna. Il program da la Regenza 2021–2024 sa focussescha sin ils puncts centrals «Digitalisaziun ed innovaziun», «Green Deal» sco er «Chantun da muntogna multifar». Ils puncts centrals da svilup ch'el cuntegna vegnan mintgamai concretisads e realisads en ils programs annuals. Il program annual 2023 qua avant maun cuntegna tut en tut 94 finamiras da l'onn ed è vegnì tractà en la sessiun da december dal Cussegl grond en il rom da la missiva tar il preventiv. Ils puncts centrals ils pli impurtants da la planisaziun annuala 2023 èn:
Augments sistematics da l'attractivitad
La Regenza sa stenta da meglierar cuntinuadamain l'attractivitad da l'administraziun chantunala sco patruna. Cun la revisiun da la Lescha dal persunal, ch'è entrada en vigur il 1. da schaner 2023, vegnan stgaffidas las basas per cundiziuns d'engaschament e da lavur progressivas. Uschia duai vegnir fatg frunt a la mancanza creschenta da persunas spezialisadas sco er a las difficultads respectivas da recrutar persunal e duai vegnir meglierada la posiziun da l'administraziun chantunala sco patruna attractiva. Er en il sectur da sanadad ed en il sectur da traffic duain vegnir realisads durant l'onn current augments sistematics da l'attractivitad. En il rom da la realisaziun da l'Iniziativa da tgira è per exempel previsa in'offensiva da scolaziun sin plaun federal e chantunal per eliminar la mancanza da persunal da tgira. Ed en il sectur dal traffic public vegn introducì l'onn 2023 il sistem digital per vender bigliets «Vendita 21». Sco sistem digital da cudeschaziun e da pajament permetta quel da cumprar e da pajar bigliets cun ils sistems da pajament existents, sco cartas da credit. Cun l'elavuraziun da la nova Strategia dad e-government e cun la Lescha davart il e-government vegnan la finala stgaffidas basas impurtantas per accelerar la digitalisaziun.
Rinforzar il Grischun sco lieu da furmaziun e d'abitar
En il sectur da furmaziun duain – cunzunt cun la construcziun dal nov Center da scola auta spezialisada modern – vegnir meglieradas l'attractivitad sco er l'attracziun naziunala ed internaziunala da la Scola auta spezialisada dal Grischun (SASGR). Il Cussegl grond ha acceptà cleramain il project tschientaner durant la sessiun d'october da l'onn passà. Il mars da quest onn ha il pievel grischun ussa la pussaivladad da s'exprimer davart il project en il rom d'ina votaziun chantunala dal pievel. Sch'il Center da scola auta spezialisada dal Grischun vegn acceptà, vegnan silsuenter instradadas emprimas lavurs da planisaziun e da realisaziun.
Chattà gist uschè gronda acceptanza ha er la Lescha davart la promoziun da la tgira d'uffants cumplementara a la famiglia en il chantun Grischun. Ella è vegnida tractada e deliberada dal Cussegl grond durant la sessiun da december 2022. L'onn current èsi previs da concepir ils detagls e da realisar il project concret. Latiers tutga particularmain l'acquisiziun d'ina software dad IT per liquidar la finanziaziun e per regular il subvenziunament da la tgira d'uffants cumplementara a la famiglia.
Planisaziun prospectiva en il sectur d'energia
Ina gronda sfida per il chantun Grischun dastgass esser la finala il sectur d'energia. Cumbain che la situaziun generala sin il martgà d'energia è sa stabilisada in pau, n'è ina stgarsezza temporara d'energia durant ils mais d'enviern betg exclusa cumplettamain. La Regenza ha chapì ils segns dal temp e prendì a temp las mesiras necessarias. L'avust da l'onn passà ha la Regenza incumbensà il stab parzial «Segirezza dal provediment d'energia» dal Stab directiv chantunal da cumenzar cun sias lavurs e d'elavurar la planisaziun preventiva necessaria. Cun questa planisaziun prospectiva duai vegnir garantì, ch'il chantun Grischun saja preparà optimalmain per in'eventuala stgarsezza d'energia.
Agiuntas:
Infurmaziuns:
President da la Regenza Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 14.00 fin las 15.00), e‑mail Peter.Peyer@djsg.gr.ch
Responsabladad: Regenza