La Regenza ha prendì posiziun tar ina consultaziun da la Cumissiun per scienza, educaziun e cultura dal Cussegl dals chantuns concernent las duas iniziativas identicas dals chantuns Basilea-Citad e Basilea-Champagna «Mesiras per in'associaziun cumplaina da la Svizra al program da perscrutaziun Horizon Europe».

En il chantun Grischun datti duas scolas autas chantunalas, in institut universitar sco er differentas instituziuns da perscrutaziun, che han tuts ina buna reputaziun sin plaun internaziunal. Ina retschertga ch'è vegnida fatga l'onn 2022 tar questas instituziuns da perscrutaziun ha mussà, che l'exclusiun da la Svizra da Horizon Europe è da sentir gia oz. Rollas directivas en projects da collavuraziun da Horizon na pon betg vegnir surpigliadas, mantegnair e gudagnar expertas ed experts directivs da perscrutaziun è difficil e tar las perscrutadras ed ils perscrutaders regia gronda malsegirezza. Quai ha consequenzas negativas per la cumpetitivitad da las instituziuns da perscrutaziun. La restricziun da la collavuraziun internaziunala en l'Europa po a lunga vista esser fitg dischavantagiusa per las scolas autas e per la perscrutaziun da la Svizra.

La Regenza ha perquai accentuà l'impurtanza da la pretensiun da las iniziativas dals chantuns, las qualas envidan il Cussegl federal ed il parlament da cuntinuar a tschertgar activamain soluziuns per in'associaziun cumplaina da la Svizra al program da perscrutaziun Horizon Europe. Plinavant ha la Regenza sustegnì la mesira transitorica da la Confederaziun per mitigiar – tras la Lescha davart il Fond Horizon – las consequenzas negativas per las perscrutadras ed ils perscrutaders a las instituziuns svizras pervia da la perdita da stabilitad en vista a la finanziaziun. La limitaziun temporara da la finanziaziun da projects fin la fin da l'onn 2027 valitescha la Regenza sco critica. Ils projects da perscrutaziun che pertutgan la perioda 2021–2024 duessan pudair vegnir finanziads fin ch'els èn terminads. Quai independentamain dal fatg, sch'il project da perscrutaziun suandant 2025–2028 è gia vegnì lantschà.

Documents da consultaziun da la Cumissiun per scienza, educaziun e cultura dal Cussegl dals chantuns

La Regenza ha prendì posiziun tar in project da consultaziun da la Cumissiun per ambient, planisaziun dal territori ed energia dal Cussegl naziunal. Ils 11 d'october 2022 ha la cumissiun – en il rom da l'iniziativa parlamentara «Restricziuns nunnecessarias e nuschaivlas da la Lescha davart las abitaziuns secundaras en connex cun la disfatga e la reconstrucziun d'abitaziuns construidas tenor il dretg vegl» – acceptà in sboz preliminar pertutgant la midada da la Lescha federala davart las abitaziuns secundaras. La midada da la lescha planisada duai particularmain augmentar la libertad d'agir da possessuras e possessurs d'abitaziuns tenor il dretg vegl, pia d'abitaziuns ch'èn situadas en vischnancas cun ina quota d'abitaziuns secundaras da passa 20pertschient e ch'existivan u ch'eran vegnidas permessas gia l'onn 2012. Da nov duai la surfatscha utilisada principala pudair vegnir engrondida senza restricziuns d'utilisaziun, sch'i vegnan construidas abitaziuns secundaras supplementaras. Plinavant duai la surfatscha pudair vegnir engrondida fin a 30 pertschient, sche l'abitaziun vegn reconstruida suenter ina disfatga, e quai senza che l'utilisaziun vegn restrenschida.

En sia resposta suonda la Regenza dal tuttafatg la posiziun da la Conferenza da las regenzas dals chantuns alpins (CRCA) dals 13 da december 2022. Per cumplettar ha ella exprimì sia tema, ch'il Tribunal federal vegnia ad interpretar la pussaivladad dal «spustament minimal dal lieu» ch'è previsa en la lescha, en moda pli restrictiva che quai ch'il chantun Grischun presuma. Il spustament dal lieu duess esser pussaivel almain sin il medem bain immobigliar. Perquai propona la Regenza, ch'in spustament commensurà dal lieu, che po divergiar tut tenor il cas singul, sto esser permess. Da princip duai il spustament dal lieu vegnir fatg sin la medema parcella. En cas da parcellas pli pitschnas e magari er da surbajegiadas cumplettas fiss però ina regla absoluta e rigurusa, sco per exempel il cunfin da la parcella, in impediment en tscherts cas singuls. Quest fatg duai er vegnir exprimì en la lescha.

Documents da consultaziun da la Cumissiun per ambient, planisaziun dal territori ed energia dal Cussegl naziunal

La Regenza ha approvà la revisiun parziala da la planisaziun locala dad Arosa, che la vischnanca aveva concludì ils 29 da november 2020. Cun questa revisiun parziala vegnan stgaffidas las premissas per engrondir l'hotel Vetter existent.

Tenor il Plan directiv chantunal (PDChant) è la vischnanca dad Arosa in lieu turistic cun funcziun da sustegn e part dal territori turistic da recreaziun intensiva, en il qual igl è previs da concentrar stabiliments turistics pli gronds resp. purschidas turisticas. Il Model directiv communal dal territori da la vischnanca dad Arosa vul pia rinforzar il lieu sco center turistic. L'hotel Vetter è situà en il center dal vitg ed en proxima vischinanza da la staziun da tren e da las staziuns da val da duas grondas pendicularas che mainan directamain en il territori da skis. Oz quinta l'hotel cun sias 23 chombras tar ils manaschis pitschens e na posseda pia betg las localitads necessarias ch'in hotel da 3 stailas dovra. Il basegn da spazi duai pia vegnir cuvrì cun in edifizi ch'è 30 meters aut.

 © Comet Photoshopping GmbH / Dieter Enz