Analogamain a las scolas popularas publicas ha l'Uffizi per la scola populara ed il sport (USS) evaluà las scolas en ils alloschis collectivs, che vegnan manadas da l'Uffizi da migraziun e da dretg civil (UMDC). Il rapport menziuna en spezial in fitg bun clima da scola ed in'atmosfera d'emprender fitg positiva. La collavuraziun tranter la magistraglia, la direcziun da la scola ed il USS è vegnida intensivada anc pli fitg.
En las scolas dals alloschis collectivs instruescha il chantun Grischun uffants che sa chattan en ina procedura d'asil u ch'èn admess provisoricamain, e quai fin ch'els pon sa mover e sa far valair independentamain en l'ambient da la scola populara. Tuttina sco en las scolas popularas publicas surpiglia l'Inspecturat da scola dal Departament d'educaziun, cultura e protecziun da l'ambient (DECA) la surveglianza. Cun l'evaluaziun vegnan giuditgadas la realisaziun dal concept da scola, la qualitad da l'instrucziun e l'atmosfera en scola. Dumandads èn vegnids scolaras e scolars, persunas responsablas per l'educaziun, persunas d'instrucziun, persunas d'instrucziun e direcziuns da las scolas popularas publicas admettentas sco er las persunas responsablas dal UMDC.
Persunas d'instrucziun cun gronda cuntentientscha
Dal rapport d'evaluaziun resortan en spezial l'auta cuntentientscha e la motivaziun da las persunas d'instrucziun. Malgrà la cumplexitad d'ina scola en alloschis collectivs en in ambient d'emprender extraordinari vegnan las scolas manadas bain. Las persunas responsablas per l'educaziun sa sentan prendidas serius ed ils uffants sa sentan bain. «Las scolas en ils alloschis collectivs na ston betg temair la cumparegliaziun cun las scolas en las vischnancas. Quai è oravant tut il merit da las persunas d'instrucziun e da la direcziun da la scola», di il president da la Regenza Peter Peyer. Quai conferman er ils resuns da las scolas regularas che admettan uffants da las scolas dals alloschis collectivs. Durant ils ultims 20 onns èn vegnids fatgs clers progress.
Prender per mauns activamain las sfidas
La midada da la scola dals alloschis collectivs en la scola populara publica na fa betg senn per mintga uffant il medem mument. En uschenumnadas sesidas da quartal discuta la direcziun da la scola perquai regularmain questa dumonda ensemen cun las persunas d'instrucziun e cun l'Inspecturat da scola. Quest process pussibilitescha, ch'i po vegnir giuditgà individualmain per mintga uffant, sche sias premissas da scola èn suffizientas per la scola publica. Uschia èsi per exempel pussaivel da sa cunvegnir per in temp d'emprova en ina classa regulara. Ulteriuras pussaivladads d'optimar vegnan fatgas actualmain en ils secturs da l'agid per far lezias e pensums, da las soluziuns transitoricas sco er da l'assistenza durant las uras marginalas e libras.
I dovra la solidaritad da las vischnancas
Il Departament da giustia, segirezza e sanadad engrazia a tut las persunas participadas per lur grond engaschament a favur dals uffants. Il medem mument appellescha el a las vischnancas, ch'ellas duajan sa mussar avertas per surpigliar uffants en las scolas popularas, sche quels adempleschan las premissas necessarias. Dal reminent indemnisescha il DECA en moda generusa l'instrucziun dals uffants da lingua estra.
Agiuntas:
Infurmaziuns:
President da la Regenza Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 13.00 fin las 14.00), e‑mail Peter.Peyer@djsg.gr.ch
Responsabladad: Departament da giustia, segirezza e sanadad