Il stab parzial Segirezza dal provediment d'energia dal Stab directiv chantunal ha terminà la planisaziun preventiva per in'eventuala stgarsezza d'energia. Sch'ils meds da communicaziun na funcziunan betg en cas da catastrofas e situaziuns d'urgenza, vegnan installads en il Grischun lieus d'inscunter d'urgenza per la populaziun, quai sco posts da consultaziun.
Il chantun Grischun ha introducì in nov concept d'urgenza. En mintga vischnanca en il chantun stat a disposiziun ussa almain in lieu d'inscunter d'urgenza per la populaziun. En cas da basegn vegn quel endrizzà en edifizis publics. Manads vegnan quests lieus d'inscunter en emprima lingia, sch'ils chanals da communicaziun sco la rait da telefon e/u il radio e la televisiun na funcziunan betg pervia d'ina stgarsezza d'electricitad u pervia d'in blackout.
Actualmain n'èn en funcziun nagins lieus d'inscunter d'urgenza – els vegnan averts mo en cas d'in eveniment. Sch'in lieu d'inscunter d'urgenza vegn mess en funcziun, dependa mintgamai da l'eveniment respectiv e da la periclitaziun. En situaziuns d'urgenza èn il lieus d'inscunter d'urgenza posts da consultaziun per la populaziun ed ils giasts, nua ch'ins survegn infurmaziuns davart la situaziun actuala u po far cloms d'urgenza (polizia, pumpiers, sanitad).
En tut las chasadas dal chantun Grischun vegn repartì damaun venderdi a la populaziun in flyer cun infurmaziuns davart ils lieus d'inscunter d'urgenza. Infurmaziuns supplementaras ed ina survista actuala davart ils lieus d'inscunter d'urgenza en il Grischun chattais Vus sut bevoelkerungsschutz.gr.ch u www.notfalltreffpunkt.ch.
La planisaziun d'eventualitads per ina stgarsezza d'energia è terminada
Cun integrar las vischnancas, l'economia ed ulteriuras organisaziuns ha il stab parzial Segirezza dal provediment d'energia adattà er la planisaziun preventiva per in'eventuala stgarsezza d'energia. Ultra da la coordinaziun da mesiras transorganisaziunalas èn tranter auter vegnids sviluppads in concept chantunal d'alarm per las forzas d'acziun ed in concept da tancar per las organisaziuns a glisch blaua. Ultra da quai ha l'administraziun chantunala stabilì in uschenumnà concept da business continuity management. En situaziuns criticas ed en cas d'urgenza pussibilitescha quel da mantegnair ils pli impurtants process da gestiun e las pli impurtantas prestaziuns da l'administraziun chantunala. Uschia resta per gronda part er mantegnida l'abilitad d'agir da l'administraziun chantunala, sche la rait electrica vegn interrutta.
Sco sustegn durant ina stgarsezza d'electricitad èn plinavant vegnids sviluppads manuals, tant per las vischnancas sco er per la populaziun. La planisaziun d'eventualitads cumplessiva, ch'è vegnida cumplettada e ch'è ussa avant maun, serva sco basa d'acziun en cas d'ina stgarsezza d'energia.
La situaziun da provediment resta vinavant tendida
Cun serrar giu la planisaziun d'eventualitads vegn il stab parzial Segirezza dal provediment d'energia dal Stab directiv chantunal sistì ad interim. Actualmain è la situaziun sa calmada in pau. Il privel d'ina stgarsezza d'energia è dentant anc adina avant maun. Perquai vegnan las autoritads chantunalas a persequitar attentamain l'ulteriur svilup. Ellas recumondan vinavant d'ir enturn cun quità cun las resursas d'energia – cun far diever da l'energia en moda raschunaivla po mintgina e mintgin prestar ina contribuziun a la segirezza dal provediment da la Svizra.
Agiunta:
flyer cun infurmaziuns davart ils lieus d'inscunter d'urgenza
Infurmaziuns per las medias:
Post da communicaziun Stgarsezza d'energia dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)
Responsabladad: Uffizi da militar e da protecziun civila / Uffizi d'energia e da traffic dal Grischun