Dapi il cumenzament da favrer stat a disposiziun ina nova charta da geografia per la scola populara dal Grischun. La charta preschenta il chantun Grischun a la scala 1:200 000. La vart davos cuntegna maletgs e chartas pli pitschnas cun infurmaziuns relevantas davart il chantun Grischun. Betg mo las scolaras ed ils scolars chattan qua bleras chaussas interessantas, mabain er las persunas che visitan noss chantun.

La nova charta geografica da scola remplazza l'anteriura charta che datescha da l'onn 2000. Entant che la vart davant cun la charta geografica actualisada sumeglia l'ediziun veglia, è la vart davos vegnida concepida da nov cun graficas modernas.

Charta da geografia stampada
Il sguard en las scolas grischunas ed er sur ils cunfins chantunals ora ha mussà, ch'igl è er vinavant giustifitgà da stampar ina charta da geografia per la 5. e 6. classa primara. En l'instrucziun dad oz vegnan las chartas stampadas e digitalas utilisadas parallelamain. Pervia da quai han ins per exempel er desistì d'integrar ina fotografia da satellit dal Grischun en la nova charta geografica da scola. Per regla vegnan talas fotografias numnadamain consultadas online.

Infurmaziuns multifaras davart il chantun
Ina gruppa da project, che sa cumpona da persunas d'instrucziun actualas dal stgalim primar, ha concepì il cuntegn da la vart davos da la charta. Elements da l'anteriura charta, ch'èn sa cumprovads, sco la «charta turistica» a la scala 1:400 000, la charta da las vias da traffic, la charta da las deflussiuns u er infurmaziuns davart las Trais Lias, èn vegnids mantegnids. Statisticas antiquadas èn vegnidas remplazzadas tras graficas modernas che sa basan sin cifras e sin fatgs davart il Grischun. Empè d'ina gronda fotografia da satellit mussan pliras fotografias pli pitschnas attracziuns e particularitads impurtantas dal Grischun. Er la plurilinguitad è vegnida considerada: Ina charta separada orientescha davart la situaziun multifara da las linguas da scola, e – repartì sur tut la charta – chatt'ins ulteriuras infurmaziuns en tut las trais linguas chantunalas.

Concurrenza da fotografias per il maletg da la cuverta
Il maletg da la cuverta da la charta, ina fotografia da la cuntrada dal Puschlav, han ins tschertgà e chattà cun agid d'ina concurrenza tranter las scolaras ed ils scolars da las 5. classas primaras. Gudagnà ha la fotografia che Clarissa Paganini ha inoltrà. La mesemna, a chaschun da la vernissascha, ha la scolara da Rodels dastgà prender encunter dal cusseglier guvernativ Jon Domenic Parolini il premi en furma d'in bon da cudeschs.

Pussaivladad da retratga
La charta geografica da scola po vegnir retratga sur il webshop dals Meds d'instrucziun dal Grischun: www.lmv.gr.ch
Numer d'artitgel 01.2101
IISBN 978-3-03847-131-8
Pretsch: 10 francs

Fotografias agiuntadas:

Maletg da la cuverta da la charta da geografia da scola 2023

Il cusseglier guvernativ Jon Domenic Parolini ha surdà il premi a Clarissa Paganini

Infurmaziuns:

Josy Marie Künzler, manadra da project, Post spezialisà per meds d'instrucziun, Uffizi per la scola populara ed il sport, tel. +41 81 257 22 61 (cuntanschibla da las 09.00 fin las 11.00), e‑mail Josy.Kuenzler@avs.gr.ch

Responsabladad: Uffizi per la scola populara ed il sport