En bundant in mais, il 1. da matg 2023, cumenza la stagiun da pestga en il Grischun. Tar la preparaziun tutga la retratga da la patenta da pestga ch'exista en differentas categorias. Persunas che cumpran ina patenta per in onn u per in mais ston cumprovar d'avair las enconuschientschas da pestga.
Las pestgadras ed ils pestgaders che vulan cumprar la patenta per ina stagiun u per in mais ston cumprovar d'avair las enconuschientschas da pestga cun l'attest davart las enconuschientschas da la materia (AEM). Las ulteriuras patentas da pestga, sco las patentas per in mez mais, per in'emna u per in di, pon dentant vegnir retratgas senza il AEM. Infurmaziuns davart il AEM, davart curs sco er davart il barat e la perdita d'attests porscha la rait «Scolaziun da pestgar».
Nua poss jau cumprar mia patenta?
Tut las categorias da patentas pon vegnir retratgas en la butietta online da l'Uffizi da chatscha e pestga (UCP). Igl è er pussaivel da retrair las patentas en il Museum da la natira dal Grischun a Cuira. Ils survegliaders da pestga stattan a disposiziun mintgamai da mardi fin sonda durant las uras da biro e suenter ina preannunzia. Las patentas pon er vegnir cumpradas senza daners contants.
Sche terzas persunas vulan retrair patentas en substituziun, ston ellas preschentar in attest da domicil da la petenta u dal petent da la patenta. Formulars da dumonda correspundents pon vegnir chargiads giu da la pagina d'internet dal UCP.
Midar a la registraziun digitala
La statistica da pestga sto vegnir manada en emprima lingia cun l'app da pestga dal Grischun. A chaschun da la retratga da la patenta ha la pestgadra u il pestgader però la pussaivladad da sa decider da manar la statistica da pestga a maun. Durant la stagiun na po la pestgadra u il pestgader dentant betg pli midar la moda da registraziun tschernida.
Umstellung auf digitale Erfassung
Actualmain registreschan passa 60 pertschient da las pestgadras e dals pestgaders lur peschs pigliads en l'app da pestga dal Grischun. Er la cumpart da las retratgas da patentas sur l'internet sa mova en questa dimensiun. Fin l'onn 2025 vul il UCP digitalisar tut. Manar la statistica da pestga a maun e retrair la patenta da pestga en moda fisica duain lura appartegnair al passà.
Las premissas per retrair la patenta da pestga figureschan sin la pagina d'internet dal UCP e vegnan er publitgadas ils 31 da mars 2023 en il Fegl uffizial chantunal.
Bitscha la ritscha!
Infurmaziuns:
Marc Hosig, manader dals Servetschs centrals, Uffizi da chatscha e pestga, tel. +41 81 257 30 90 (cuntanschibel da las 10.00 fin las 12.00), e‑mail Marc.Hosig@ajf.gr.ch
Responsabladad: Uffizi da chatscha e pestga