En il territori stip sur la via da la Val Calanca, tranter l'access da Castaneda e Molina, èsi vegnì giu il venderdi en damaun ina bova, suandada d'ina crudada da blocca. La via da la Val Calanca è serrada per il traffic fin las 16.00. La via ed in auto da persunas èn vegnids donnegiads levamain.
Suenter las fermas precipitaziuns da la notg è ina bova sa distatgada venderdi, curt avant las 07.00, var 150 meters sur la via. Var 50 meters cubic material èn glischnads a val. Il material è svelt puspè sa deposità. Singuls blocs gronds èn dentant rudlads vinavant ed han cuntanschì la via da la Val Calanca sin il traject tranter la punt artgada sur la Calancasca e Molina. Ina stgaglia d'in crap ha lura tutgà il viertgel dal motor d'in auto. Il manischunz n'è betg vegnì blessà ed ha pudì cuntinuar il viadi senza ulteriur agid. Vi da l'auto hai dà in donn material da circa 1000 francs. La cuvrida da la via è vegnida donnegiada levamain.
La via è puspè charrabla a partir dad oz suentermezdi a las 16.00
Pervia da las precipitaziuns cuntinuantas e pervia da la tschajera è l'emprim giudicament dal privel stà pussaivel pir oz da mezdi. Tenor quest giudicament, ch'è vegnì fatg d'in geolog per incumbensa da l'Uffizi da construcziun bassa, è la segirezza per il traffic garantida tant enavant, che la via è puspè charrabla sut surveglianza circa a partir da las 16.00. Il traffic po circular en furma dosada. La notg, vul dir da las 20.00 fin las 07.00, resta la via serrada per il traffic. Quai vala er per la notg da la sonda sin la dumengia. Tut tenor la situaziun da l'aura restan questas mesiras previsiblamain en vigur fin glindesdi en damaun a las 07.00.
Il lieu da distatga da la bova actuala sa chatta var 200 meters sut il lieu da distatga da la crudada da grippa dal december 2022 (guardar communicaziun a las medias dals 05-12-2022).
Fotografia agiuntada:
Suenter la bova: via da la Val Calanca levamain donnegiada
Infurmaziuns:
- Andrea Peduzzi, schef dal district 2 Mesauc, Uffizi da construcziun bassa dal Grischun, tel. +41 91 822 81 15, e‑mail Andrea.Peduzzi@tba.gr.ch
- Christoph Nänni, manader dal sectur Geologia & privels da la natira, Uffizi da construcziun bassa dal Grischun, tel. +41 81 257 38 33, e‑mail Christoph.Naenni@tba.gr.ch
Responsabladad: Uffizi da construcziun bassa