Ord la finanziaziun speziala Sport (FS Sport) ha la Regenza concedì pliras contribuziuns a centers da trenament regiunals e naziunals che han lur sedia e lur activitad principala en il chantun Grischun. Plinavant ston ils centers da trenament esser previs en il concept da juniors da la federaziun naziunala e pudair cumprovar ch'els survegnan ina contribuziun a la promoziun da juniors da Swiss Olympic. A tut en tut 37 centers da trenament ha la Regenza uschia garantì contribuziuns da totalmain 750 000 francs.

Plinavant ha la Regenza garantì ina contribuziun da maximalmain 130 000 francs a l'Associaziun grischuna da sport per organisar il «Di dal sport grischun 2024». Er questa contribuziun chantunala è vegnida concedida en il rom da la finanziaziun speziala Sport.

© Ladina Cantieni (Engadin Nordic, RLZ Oberengadin)

Il chantun sustegna il fatg da proveder la regiun Partenz/Tavau cun bindel ultralad (BUL). Sin basa dals concepts regiunals d'avertura ch'èn vegnids inoltrads, ha la Regenza concedì ina contribuziun chantunala cun in import maximal da 3,8 milliuns francs. La regiun vegn ussa ad entrar en discurs cun purschiders d'infrastructura per concretisar sin plaun communal l'avertura previsa.

In'avertura cumpetitiva da las regiuns cun colliaziuns d'internet en il sectur dal bindel ultralad (almain 100 Mbit/s) è ina premissa impurtanta per far avanzar la transfurmaziun digitala en il chantun Grischun. Il basegn da l'economia, dal turissem, da las administraziuns, da las scolas, da las instituziuns da provediment e da las persunas privatas d'avair in'avertura da qualitad s'augmenta cuntinuadamain pervia da las applicaziuns che dovran bleras datas. In'avertura cun l'internet ch'è orientada al basegn, è in factur essenzial per il svilup economic da las regiuns sco er per l'attractivitad da l'economia locala dal chantun. Perquai promova il Grischun l'extensiun dal bindel ultralad cun contribuziuns dal credit d'impegn per infrastructuras relevantas per il sistem.

Il vitg da Brinzauls è evacuà cumplettamain dapi la saira dals 12 da matg 2023. Dapi lura èsi scumandà d'entrar en il vitg. In volumen da grip da fin 2 milliuns meters cubic sa mova là uschè svelt, ch'igl è da far quint entaifer ils proxims dis fin entaifer paucas emnas ch'el rumpia giu. L'eveniment concret na sa lascha dentant betg prevair exactamain. La vischnanca dad Alvra ha endrizzà in conto da donaziuns per las persunas pertutgadas da la bova da Brinzauls. Las donaziuns che entran vegnan duvradas sco agid direct per las persunas e per las instituziuns pertutgadas che subeschan donns pervia da la bova da Brinzauls e ch'èn perquai dependentas d'agid.

L'utilisaziun correcta dals daners da donaziuns duai vegnir garantida tras ina cumissiun da donaziuns. Questa cumissiun vegn nominada da la vischnanca. La Regenza ha prendì enconuschientscha dal fatg, che la cussegliera naziunala Anna Giacometti è sa declerada pronta da surpigliar l'uffizi sco parsura da la cumissiun da donaziuns. La Regenza l'engrazia gia ussa per quest engaschament impurtant. Tut las infurmaziuns concernent il conto da donaziuns ed en general concernent la bova da Brinzauls èn publitgadas sin www.brienzer-rutsch.ch.

© Uffizi da guaud e privels da la natira