Dals 25 da november fin ils 10 da december 2023 metta il Grischun puspè in signal cunter la violenza a chasa. Ils dis d'acziun da quest onn mettan il focus sin il tema «violenza psichica». Il chantun po sustegnair finanzialmain organisaziuns che sa participeschan e che realiseschan in'occurrenza u in'acziun.
La violenza a chasa ha bleras fassettas e n'enconuscha nagins cunfins, ni en reguard geografic e cultural ni areguard ils conturns socials, las furmas u la dimensiun. Il sectur da la violenza a chasa cumpiglia tut las acziuns da violenza corporala, sexuala, psichica u economica, e quai entaifer la famiglia u la chasada ubain tranter conjugals anteriurs u actuals ubain tranter partenarias u partenaris anteriurs u actuals.
Sustegn e finanziaziun tras il chantun
Cun ils Dis d'acziun cunter violenza a chasa dals 25 da november fin ils 10 da december 2023 gida il chantun Grischun, ensemen cun differentas organisaziuns, a prevegnir ed a cumbatter la violenza a chasa. La campagna «16 dis cunter violenza envers dunnas» è coordinada sin plaun naziunal e cuntegna er ils «Orange Days». Il tema central da quest onn è la «violenza psichica».
Il Post da coordinaziun Violenza a chasa dal chantun Grischun coordinescha ils dis d'acziun en il chantun e prepara in flyer dal program cun tut las occurrenzas ed acziuns annunziadas. Ultra da quai po il chantun sustegnair finanzialmain occurrenzas ed acziuns che han lieu durant ils dis d'acziun en il Grischun e che tractan il tema general «violenza a chasa» sco er il tema central «violenza psichica».
Annunzias e dumondas correspundentas pon vegnir inoltradas fin il 1. da settember 2023. Ils formulars pon vegnir chargiads giu da la pagina d'internet dal Post da coordinaziun.
Agiuntas:
formular d'annunzia per in'occurrenza u in'acziun
formular da dumonda per sustegn finanzial per organisar e per manar tras in'occurrenza u in'acziun
Infurmaziuns:
Madlaina Baselgia, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11, e‑mail Madlaina.Baselgia@soa.gr.ch
Responsabladad: Uffizi dal servetsch social