Ils 29 da zercladur 2023 ha la rait Diversity-gr envidà interpresas dal spazi economic grischun ad in discurs da lavur a Cuira. Vegnids tadlads èn lur basegns e dumondas davart temas sco egualitad e cumpatibilitad. Las discussiuns animadas han mussà: Il basegn e las largias da savida èn grondas e la francaziun structurala en las interpresas (anc) pitschna. Questas sfidas vul la rait Diversity-gr prender per mauns.
Ina sfida speziala per las interpresas è quella da chattar la ballantscha tranter ina gronda prestaziun e l'umanitad. Quai ha Esther-Mirjam de Boer ditg a chaschun da ses referat d'impuls al cumenzament dal discurs da lavur da Diversity-gr dals 29 da zercladur 2023. «La glieud vegn pervia da la firma e va pervia dal schef», ha ella resumà sin il punct. L'experta da diversity ch'è participada a pliras interpresas e che fa part da tschintg cussegls d'administraziun ha mussà, tge schanzas che la transfurmaziun digitala ed ils teams divers portan e co ch'ins po persvader – e tegnair – collavuraturas differentas e collavuraturs differents. En vista a la mancanza da forzas da lavur èn sias explicaziuns stadas spezialmain inspirantas per las persunas preschentas. In avantatg dal Grischun saja la vischinanza a la natira ed als territoris da recreaziun, uschia de Boer. E quest avantatg stoppian las interpresas resguardar pli savens. «Collavuraturas e collavuraturs sauns, recreads e cuntents èn collavuraturas e collavuraturs fidaivels.»
La francaziun structurala da l'egualitad e da la diversitad è anc pitschna
Suenter il referat d'impuls han las participantas ed ils participants approfundà en quatter gruppas cun moderaziun cumpetenta ils temas «cumpatibilitad da la professiun cun auters secturs da la vita», «recrutaziun», «svilup dal persunal e management da talents» sco er «francaziun structurala ed organisatorica». In problem ch'è vegnì tematisà en tut las gruppas, èn las structuras per la tgira d'uffants che mancan en il Grischun. Plinavant han ins constatà, che las francaziuns structuralas da l'egualitad e da la diversitad en las interpresas èn anc marginalas e che la savida e la sensibilisaziun areguard ils temas da l'egualitad èn correspundentamain pitschnas.
Plattafurma per barattar experientschas e per sensibilisar
Tals temas ed er sumegliants vul la rait Diversity-gr prender per mauns en l'avegnir. Il discurs da lavur è in pass sin questa via. A las interpresas porscha Diversity-gr ina plattafurma per il barat d'experientschas, sensibilisescha per contexts e propona cun agid da fatgs, da buns exempels e d'impuls da reflexiun soluziuns pussaivlas per francar la prontezza per la diversitad en la cultura da las firmas. Pledentadas vegnan oravant tut las interpresas dals secturs tecnica, IT, economia e perscrutaziun, nua che la quota da dunnas è tendenzialmain pitschna. Diversity-gr stat dentant er a disposiziun ad autras branschas. In proxim element è in'occurrenza publica, ils 12 da favrer 2024, cun ils temas centrals leadership e francaziun.
La rait vegn purtada dal Post da stab per l'egualitad da las schanzas per dunnas ed umens, dal center d'innovaziun CSEM, da l'Academia Raetica, da la rait «Women in Tech Switzerland», da la Scola auta spezialisada dal Grischun, dal Center da las IPM dal Grischun, da la Scola auta da pedagogia dal Grischun, da la Somedia e da l'agentura Markenkern.
Ulteriuras infurmaziuns:
https://diversity-gr.ch
Fotografias agiuntadas:
Esther-Mirjam de Boer mussa en ses input las schanzas da teams divers.
En ils workshops èn vegnidas manadas discussiuns davart differents temas.
© Post da stab per l'egualitad da las schanzas per dunnas ed umens
Infurmaziuns:
Responsabladad: Post da stab per l'egualitad da las schanzas per dunnas ed umens