Ils 22 da fanadur 2023 ha in chatschader purtà la cumprova segira d'ina reproducziun da lufs-tscherver sin il territori communal da Zernez. I sa tracta qua da l'emprima cumprova en l'Engiadina, dapi ch'il luf-tscherver era vegnì extirpà qua avant quasi exactamain 150 onns.

La saira tard dals 22 da fanadur 2023 èsi gartegià ad in chatschader da far ina cumprova fotografica cun valur da raritad, durant ch'el observava selvaschina en il territori communal da Zernez. Tras il telescop ha el pudì observar e fotografar ina luffa-tscherver en cumpagnia da dus lufs-tscherver giuvens da quest onn. I sa tracta qua da l'emprima cumprova segira da pitschens lufs-tscherver en l'Engiadina, dapi ch'il luf-tscherver era vegnì extirpà qua durant la segunda mesadad dal 19avel tschientaner. Gia l'onn avant avevan chatschaders annunzià d'avair observà ad egl pitschens lufs-tscherver. Per mancanza da cumprovas n'eri però betg stà pussaivel da confermar questas observaziuns. En l'Engiadina Bassa è il luf-tscherver vegnì extirpà enturn l'onn 1872. Dapi almain 3 onns viva in mastgel, B760, permanentamain en la regiun enturn Zernez. L'identificaziun da la femella cun ils animals giuvens è anc pendenta.

Lufs giuvens er en il territori dal Beverin
En sis dals tut en tut 11 trieps da lufs entaifer ils cunfins chantunals han ins pudì confermar tut en tut 20 chagniels lufs fin la fin da fanadur. Remartgabels en quest connex èn spezialmain ils svilups en ils trieps dal Beverin e da Moesola. Tranter l'october ed il november 2022 è numnadamain vegnì sajettà mintgamai il bab-luf da quests trieps. Mo paucs mais suenter la perdita d'in bab-luf han ins puspè constatà chagniels lufs en tuts dus trieps. Quai exemplifitgescha ina giada dapli, quant gronda che la dinamica en la populaziun dals lufs è actualmain.

Sco protecziun cunter disturbis na vegnan las cumprovas dals chagniels lufs, ils quals èn anc pauc movibels, betg preschentadas sin la charta publica da las cumprovas dals animals da rapina gronds, ch'è publitgada sin la pagina d'internet da l'Uffizi da chatscha e pestga.

Fotografias agiuntadas:

Femella da luf-tscherver cun ses pitschens

Infurmaziuns:

Arno Puorger, collavuratur academic Animals da rapina gronds, Uffizi da chatscha e pestga, tel. +41 81 257 87 67 (cuntanschibel da las 09.00 fin las 11.00), e‑mail Arno.Puorger@ajf.gr.ch

Responsabladad: Uffizi da chatscha e pestga