La Regenza ha mess en vigur per il 1. da schaner 2024 la revisiun parziala da la Lescha davart ils dretgs politics en il chantun Grischun (LDPC) dals 12 da favrer 2018 ed ha plinavant approvà la revisiun parziala da l'ordinaziun respectiva (ODPC). Uschia ha la Regenza stgaffì la basa giuridica per far emprovas cun la votaziun electronica (e-voting) en il chantun Grischun.

En il rom d'in manaschi d'emprova vul il Grischun pussibilitar a partir da l'onn 2024 la votaziun electronica en sis vischnancas da pilot. Actualmain vegnan exequidas las lavurs preparatoricas respectivas. Tras l'entrada en vigur da la revisiun da la LDPC dispona il chantun Grischun – a partir dal 1. da schaner 2024 – da las basas giuridicas necessarias per votaziuns ed elecziuns sin via electronica. Ultra da l'admissiun generala da la votaziun electronica sco ulteriur chanal da votaziun cuntegna la revisiun ina procedura d'annunzia per persunas che vulan utilisar il e-voting sco er ina procedura d'annunzia serrada (procedura da propostas) per elecziuns d'autoritads sin plaun chantunal u regiunal en la procedura da maiorz a l'urna.

La Regenza ha approvà l'elavuraziun dals documents tar il nov med d'instrucziun «Schauplatz Ethik 7–9» per talian. Quest med d'instrucziun è concepì per las finamiras da l'instrucziun dal rom «etica» en il Plan d'instrucziun 21 (PI21). El cuvra ils champs da cumpetenza «experientschas fundamentalas umanas», «filosofar», «valurs e normas» sco er «furmaziun etica da l'opiniun». La finamira primara dal med d'instrucziun n'è betg l'intermediaziun da valurs, mabain il svilup d'ina conscienza per las ideas da las valurs, che sa mussan en il rom da dumondas dispitaivlas e da situaziuns problematicas. Ils custs totals dal project importan 70 000 francs.

Plinavant ha la Regenza dà glisch verda per la translaziun dal med didactic online existent «Profolio» en sursilvan. Tras il PI21 è er il rom «orientaziun professiunala» vegnì introducì en la 2. classa dal stgalim secundar I da la scola populara grischuna, quai cun l'onn da scola 2018/19. Per sustegnair las persunas d'instrucziun dal stgalim secundar I dal Grischun rumantsch en quest rom impurtant dal PI21, duai vegnir mess a disposiziun in med d'instrucziun en rumantsch. Igl è previs da porscher quest med d'instrucziun per entant en sursilvan e d'extender il project en cas da basegn sin las autras regiuns linguisticas. Ils custs totals dal project importan 77 000 francs.

© S&B Institut für Berufs- und Lebensgestaltung AG

La Regenza ha approvà la revisiun parziala da la planisaziun locala che la vischnanca da San Murezzan aveva concludì ils 27 da november 2022. Uschia ha ella stgaffì las premissas da la planisaziun d'utilisaziun per realisar il «nov» project per l'hotel Laudinella.

Il project prevesa in auzament dal tract amez cun appartaments sco er dal plaun d'attica. Plinavant duai vegnir mantegnida e sanada la chasa Metropol-Olympia ed er las plazzas da parcar sin l'areal da l'hotel duain vegnir reorganisadas.

©2020 Andrea Badrutt, Chur

En il rom da la nova politica regiunala (NPR) ha la Regenza concedì a la secziun Winterthur dal Club alpin svizzer (CAS) ina contribuziun chantunala da 162 521 francs per renovar la Camona da Cavardiras CAS sin territori communal da Mustér. La contribuziun vegn concedida en connex cun in emprest NPR da 700 000 francs.

La Camona da Cavardiras CAS sin 2649 meters sur mar duai vegnir adattada als basegns dals giasts d'ozendi e vegn a porscher dapli confort e sfera privata. Il dumber da plazzas da durmir vegn reducì da 60 a 49. La renovaziun da l'infrastructura duai tegnair quint dad aspects ecologics e correspunder al pli nov stadi da la tecnica. La chamona che n'era betg isolada bain avunda fin ussa, survegn ina isolaziun termica. Las lavurs da construcziun duain cumenzar il settember 2024 ed esser terminadas il settember 2025.

 

© ARGE Hellingman Martin, siaa. triulzi