La Regenza ha approvà la revisiun parziala da l'Ordinaziun davart la planisaziun dal territori per il chantun Grischun. La revisiun da l'ordinaziun duai entrar en vigur il 1.da settember 2023. Tras la revisiun parziala vegnan stgaffidas las basas legalas per realisar l'uschenumnà «Solarexpress» (implants solars autalpins).

Per realisar il «Solarexpress» ha il chantun gia publitgà il cumenzament da fanadur 2023 in mussavia detaglià (cf. communicaziun a las medias dals 6 da fanadur 2023), ch'è vegnì elavurà d'ina gruppa da lavur surdepartamentala. Quest mussavia cuntegna tut las chaussas interessantas per las petentas ed ils petents (las gestiunarias ed ils gestiunaris dals implants), las vischnancas (sco organ approvant e sco autoritad) ed er per las autoritads chantunalas (cooperaturas e cooperaturs sco er autoritad che conceda las permissiuns da construcziun) tant areguard las premissas da la permissiun sco er areguard las proceduras da permissiun.

La Regenza designescha la firma IntegrityPlus SA da Turitg sco post independent per annunziar incunvegnientschas en il sectur dal persunal da l'administraziun chantunala, da las dretgiras e dals instituts chantunals autonoms. Per rinforzar l'uschenumnada compliance e l'integritad da las collavuraturas e dals collavuraturs è vegnida stgaffida cun la revisiun parziala da la Lescha dal persunal (art. 47a LP) sin il 1. da schaner 2023 ina basa legala per il nov sistem d'annunzia per incunvegnientschas. Il post d'annunzia cumenza cun ses manaschi productiv uschè svelt sco pussaivel. Avant ston anc vegnir definids ils detagls ed ils andaments concrets ensemen cun l'IntegrityPlus SA.

Sco incunvegnientschas pussaivlas vegnan cunzunt considerads acts chastiabels sco engion, corrupziun u defraudaziun, ma er auter cumportament finanzial sbaglià, discriminaziun, mobing, mulesta sexuala, violaziuns da la persunalitad u cuntravenziuns cunter las obligaziuns da servetsch, prescripziuns da la protecziun da datas, da la protecziun da l'ambient u da la segirezza da lavur. Annunziadas pon vegnir incunvegnientschas, sche las collavuraturas ed ils collavuraturs pertutgads èn da l'avis, che quellas constattian per motivs objectivs (q.v.d. «en buna fai») e che l'annunzia saja en l'interess bain chapì da las patrunas e dals patruns, pia na vegnia betg fatga ord spir agen interess (q.v.d. «onestamain»). L'annunzia d'incunvegnientschas po vegnir fatga en moda anonima ed il post d'annunzia è obligà da mantegnair l'anonimitad da las persunas che las annunzian. Las collavuraturas ed ils collavuraturs pon annunziar in suspect correspundent dentant anc adina sin via uffiziala a lur superiurs directs u pli auts.

La Regenza renconuscha la nova staziun Cuira Vest sco mesira subvenziunabla per promover il traffic public ed empermetta a la citad da Cuira – cun resalva da l'approvaziun dal credit tras il Cussegl grond – ina contribuziun chantunala tenor la Lescha davart il traffic public (LTrP) da maximalmain 3,7 milliuns francs. Tut en tut custa il project 67,9milliuns francs. Ina gronda part dals custs d'investiziun per la renovaziun da la staziun – var 37 milliuns francs – vegn finanziada tras la Viafier retica sur il fond per l'infrastructura da viafier da la Confederaziun (FIV).

La staziun futura Cuira Vest è planisada sco center da traffic multimodal cun colliaziun al traffic public surregiunal, in element central en il rom dal svilup a curta ed a media vista en il territori da la citad Cuira Vest. Ella duai gidar considerablamain a rinforzar il traffic public sco er il traffic betg motorisà. En spezial ston er vegnir realisadas las pretensiuns da la Lescha federala davart l'eliminaziun dals dischavantatgs envers persunas cun impediments. Il project da la citad da Cuira sa cumpona da 13 projects parzials, dals quals quatter èn subvenziunabels tenor la LTrP. Elements centrals furman la nova staziun Cuira Vest, las entradas als perruns ost e vest, la nova plazza da la staziun, la staziun da midada da bus e da l'auto da posta, la staziun da velos, las colliaziuns da sendas e vias da velo, l'engrondiment da la punt Raschärenstrasse, la renovaziun da la Raschärenstrasse e la sanaziun dal sutpassadi Rheinfelsweg. Il Cussegl grond vegn a tractar questa fatschenta en la sessiun da december 2023 en il rom da la missiva tar il preventiv. Il credit d'impegn sto vegnir suttamess al referendum da finanzas facultativ.

 

© RhB/Stadt Chur

La Regenza ha approvà las revisiuns parzialas da la planisaziun locala da la vischnanca da Samignun ils 18 da december 2022. Uschia stgaffescha ella las premissas da la planisaziun d'utilisaziun per construir ina telecabina da 10 «Laret – Champs – Muller» sco stabiliment d'avertura supplementar da la vallada en il territori da skis Samignun. En il rom dal project duain ultra da quai er vegnir adattadas las vias agriculas e forestalas, las vias e sendas da viandar, las vias da velo da muntogna sco er las loipas da passlung.

 

© Comet Photoshopping GmbH, Dieter Enz / © SWISSIMAGE