Sin invitaziun da la Regenza ha l'ambassadura austriaca, Maria Rotheiser-Scotti, visità oz il chantun Grischun.

L'ambassadura austriaca Maria Rotheiser-Scotti è vegnida beneventada oz en la Chasa grischa a Cuira dal president da la Regenza Peter Peyer e dal chancelier Daniel Spadin. L'ambassadura Rotheiser-Scotti è vegnida accumpagnada dal delegà commerzial Patrick Sagmeister e da la referenta Céline Caversaccio. Suenter il barat dals salids uffizials è in gentar cuminaivel stà sin il program.

La Regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

Da sanestra: chancelier Daniel Spadin, ambassadura Maria Rotheiser-Scotti, president da la Regenza Peter Peyer e Patrick Sagmeister.

Responsabladad: Regenza