Represchentantas e represchentants da la Confederaziun, dals chantuns, da las regiuns e da las vischnancas èn sa scuntrads la gievgia, ils 12 d'october 2023, per la quarta maisa radunda davart il tema traffic da guntgida per lung da la A13 e da la A28. En il center è stada la realisaziun tecnica planisada da las mesiras d'enviern sco er l'emprim facit intermediar dal manaschi da la primavaira e da la stad passada.

Las experientschas da l'emprova da pilot da l'enviern passà mussan, che las mesiras ch'ins ha prendì per lung da la A28 a las sortidas Jenaz, Schiers, Grüsch, Seewis, Zizers e Landquart Ost han purtà ils resultats giavischads. Las mesiras èn vegnidas realisadas cun agid da furniturs da servetschs privats. A chaschun da la quarta maisa radunda èn vegnidas preschentadas soluziuns pussaivlas per in meglier sustegn cun agid d'indrizs tecnics.

In pass en direcziun automatisaziun
Durant la fasa da pilot è la pli gronda sfida stada quella da prevesair uschè precis sco pussaivel las quantitads da traffic, per pudair activar a temp las mesiras necessarias. En quest connex vegn la constataziun tempriva cun agid da registraziuns da traffic a giugar ina rolla centrala. Quellas èn la premissa per pudair diriger ils indrizs en moda centrala.

L'introducziun d'ina retschertga automatisada dals dumbers da traffic ed uschia d'ina direcziun centrala dals implants, n'è per quest enviern betg realistica, quai per motivs dal temp ch'i dovra per las preparaziuns. Als medems lieus vegnan perquai applitgadas soluziuns parzialmain automaticas sco durant il project da pilot da l'enviern 2022/23. Concretamain signifitgescha quai: amplas da traffic da plazzals che vegnan dirigidas tras persunal al lieu. En cumparegliaziun cun l'enviern passà pon ils custs da persunal uschia almain vegnir reducids. La finamira a lunga vista è però anc adina l'introducziun da soluziuns cumplettamain automatisadas, che dovran pli pauc u schizunt nagin persunal al lieu.

Sguard enavos sin il manaschi da primavaira e da stad
Er sa cumprovadas èn las mesiras ch'ins ha realisà la stad/primavaira 2023 per lung da la A13: Las finamiras principalas da questas mesiras – pia evitar traffic stagnant en ils vitgs pertutgads dal traffic da guntgida, sco er garantir la circulaziun da las organisaziuns a glisch blaua e dal traffic public entaifer ils vitgs – èn per gronda part vegnidas realisadas. La pli gronda modificaziun envers l'onn 2022 è stada la midada da triaschas a dosagis. Uschia correspundan las mesiras a l'Ordinaziun davart las vias da transit da la Confederaziun. Per in manaschi permanent ed a lunga vista cun soluziuns tecnicas ston ins perquai preferir ils dosagis a las triaschas.

Collavuraziun interchantunala
Il tema traffic da guntgida na chala betg al cunfin chantunal: Gia en il passà è il chantun Son Gagl stà involvì en ils projects da pilot. En coordinaziun cun il chantun Grischun ha el prendì mesiras cumplementaras a l'entrada da Ragaz Bogn per impedir il traffic da transit. Questa collavuraziun cun il chantun Son Gagl vegn ad avair lieu er en l'avegnir. En il focus èn qua la coordinaziun da las mesiras e da las uras d'acziun. Pertutgadas èn en spezial la fusiun d'autostradas a Sargans sco er la via chantunala tranter Landquart e Ragaz Bogn e tranter Maiavilla e Ragaz Bogn.

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 08.30 fin las 11.00), e‑mail Reto.Knuchel@tba.gr.ch
• Andreas Pöhl, manader Gestiun dal traffic, Uffizi da construcziun bassa dal Grischun, tel. +41 81 257 37 62 (cuntanschibel da las 08.30 fin las 11.00), e‑mail Andreas.Poehl@tba.gr.ch

Responsabladad: Uffizi da construcziun bassa