La Regenza ha approvà il program da cooperaziun (Programma di cooperazione transfrontaliera Interreg VI A Italia–Svizzera) sco er la cunvegna da program (Convenzione di programma Interreg VI Italia–Svizzera 2021-2027) tranter la Confederaziun ed ils trais chantuns svizzers participads Tessin, Vallais e Grischun. Per la perioda da program che dura 7 onns metta il chantun Grischun a disposiziun 3 206 000 francs. 

En il focus dal program «Interreg VI A Italia–Svizra 2021-2027» stattan tranter auter projects dals secturs da l'innovaziun e dal transfer da tecnologia, da l'adattaziun a la midada dal clima ed a la resilienza, da la mobilitad persistenta e transcunfinala, dal turissem sco er da la valurisaziun da la natira e da la cultura.

Il chantun Grischun persequitescha la finamira d'avair bunas relaziuns externas cun ses vischins naziunals ed internaziunals e dat a quellas pli e pli impurtanza. En il rom da sia politica da coesiun promova l'Uniun europeica cun programs d'Interreg la collavuraziun transcunfinala e transnaziunala da ses pajais commembers e da terzs stadis. La finamira è quella da prender per mauns cuminaivlamain sfidas e da sviluppar soluziuns innovativas per utilisar ils potenzials disponibels, e tut quai cun agid da projects transcunfinals. Il chantun sa participescha dapi l'onn 1996 ad Interreg, durant las ultimas periodas da promoziun mintgamai als programs transcunfinals «Italia–Svizra» e «Rain Alpin–Lai da Constanza–Rain Aut». La participaziun da la Confederaziun als programs d'Interreg ha lieu en il rom da la Nova politica regiunala.

La revisiun parziala da la Lescha chantunala davart la protecziun da la natira e da la patria (LNPGR) ch'è vegnida concludida dal Cussegl grond, entra en vigur sco previs il 1. da november 2023. Il termin da referendum è scadì ils 24 da schaner 2023. Entaifer quest termin n'èn vegnids inoltrads nagins referendums. Cun la revisiun parziala da l'Ordinaziun chantunala davart la protecziun da la natira e da la patria (ONPGR) ha la Regenza approvà las disposiziuns executivas. Cun l'entrada en vigur da la revisiun parziala vegn abolida la pausa d'inventarisaziun areguard l'Inventari chantunal dals edifizis. Questa pausa era vegnida decretada cun il conclus da la Regenza dals 3 da november 2020. La registraziun da l'Inventari chantunal dals edifizis po pia puspè vegnir reprendida e cuntinuada sin ina nova basa.

En connex cun l'elavuraziun da l'Inventari chantunal dals edifizis vegn reglada da nov l'inclusiun da las vischnancas en il process. Er ils criteris per inscriver in object en l'Inventari chantunal dals edifizis vegnan concretisads.

Per precisar e concretisar ils criteris menziunads ha la Tgira da monuments dal Grischun elavurà il «Agid d'execuziun tar l'Inventari chantunal dals edifizis». Il cuntegn da quest agid d'execuziun sco er ils decurs concrets per elavurar l'Inventari chantunal dals edifizis vegnan explitgads bainbaud per tut las persunas interessadas en il rom d'ina occurrenza d'infurmaziun.

Il chantun Grischun cuntinuescha durant ulteriurs 4 onns (2024-2027) cun la buna collavuraziun cun la fundaziun SvizraMobila. Las prestaziuns da SvizraMobila han ina gronda impurtanza per il chantun Grischun. Er en la cumparegliaziun internaziunala ha la pagina d'internet da la fundaziun ina posiziun speziala. Tut las purschidas èn segnadas en la cuntrada cun ina signalisaziun da ruta speziala. Las infurmaziuns davart las rutas han ina concepziun unitara, èn d'auta qualitad e vegnan preschentadas en pliras linguas. Sin in'app pon ins clamar si tut las rutas e las infurmaziuns respectivas. L'infrastructura existenta dal traffic turistic betg motorisà – che vegn meglierada cuntinuadamain – vegn valurisada supplementarmain en il chantun grazia a las rutas da SvizraMobila. Tar questas rutas èn dal rest er vegnidas creadas bleras purschidas ch'ins po reservar. Per quests motivs ha la Regenza concedì ina contribuziun chantunala da totalmain 244 000 francs (61 000 francs per onn).

© SvizraMobila

La Regenza garantescha a l'Uniun grischuna d'artisanadi e mastergn ina contribuziun chantunala da maximalmain 370 000 francs per l'exposiziun professiunala FIUTSCHER 2023 che ha lieu a Cuira.

L'exposiziun professiunala FIUTSCHER 2023 ha lieu dals 15 fin ils 19 da november 2023 a Cuira. Tenor l'Uniun grischuna d'artisanadi e mastergn èn s'annunziads 80 expositurs, che vegnan a preschentar en la Halla da la citad da Cuira 150 professiuns e 240 furmaziuns supplementaras. La surfatscha da l'exposiziun è vegnida engrondida per var 1000 meters quadrat ed il program accumpagnant vegn extendì per cuntanscher las gruppas en mira da las persunas responsablas per l'educaziun, dals confamigliars, da las persunas d'instrucziun e da la vasta publicitad cun differents temas davart la furmaziun professiunala. Durant l'exposiziun professiunala FIUTSCHER vegn ultra da quai manà tras il Campiunadi svizzer da las spezialistas e dals spezialists da products da charn.

© Uniun grischuna d'artisanadi e mastergn

La Regenza ha concedì ina contribuziun da maximalmain 60 000 francs ord la finanziaziun speziala Sport a la Federaziun grischuna da skis per la realisaziun dal project da biatlon «Become a shooting star».

En il rom dal Campiunadi mundial da biatlon 2025 a Lai vul la Federaziun grischuna da skis – en collavuraziun cun ulteriurs partenaris – render enconuschent il sport da biatlon en las scolas grischunas. En il rom dal project duai vegnir engaschà per dus onns in'ambassadura u in ambassadur da biatlon. Questa persuna vegn a visitar las scolas primaras grischunas ed a mussar a las scolaras ed als scolars il sport da biatlon a maun d'ina lecziun da sport pratica en la halla da gimnastica. La finamira è quella d'entusiasmar ils uffants da scola per quest sport cun als laschar experimentar il tir cun in schluppet da laser da biatlon. Ils uffants da scola duain vegnir motivads da visitar in trenament da fufragnadi en in club da skis grischun che porscha biatlon. Correspundentamain èsi previs da visitar principalmain scolas cun clubs da skis en ils proxims conturns, ils quals porschan suenter er lecziuns da fufragnadi e trenaments cuntinuants.

La Regenza ha approvà sut tschertas cundiziuns il project «Avertura forestala Horawald» da la vischnanca da Sursaissa Mundaun ed ha concedì ina contribuziun chantunala da maximalmain 4 968 000 Franken.

Il project cuntegna la sanaziun da la via da guaud da St.Martin fin Bäraboda ch'è 2090 meters lunga, la sanaziun da la via da Gluggeri fin Bebmerbrunna ch'è 1880 meters lunga sco er la sanaziun da la via da Schindelboda fin Hindara Horawald ch'è 2040 meters lunga. Ils guauds en il territori dal project protegian abitadis, vias chantunalas sco er interpresas e manaschis industrials da lavinas, da sbuvadas, da bovas e d'auas grondas. Ultra da quai adempleschan quests guauds er ina funcziun impurtanta per la producziun da laina. Per ademplir duraivlamain questas funcziuns dal guaud dovri ina tgira ed ina cultivaziun correspundenta. L'avertura actuala da quests guauds è dentant insuffizienta. Insuffizientas èn cunzunt la ladezza e la capacitad da chargia da las vias existentas, uschia ch'i n'è betg pussaivel da cultivar il guaud en moda effizienta e segira. Per consequenza èsi necessari da meglierar l'avertura dal guaud. Cun la sanaziun da las vias existentas pon ils guauds vegnir cultivads en l'avegnir en moda professiunala ed effizienta.