L'onn 2024 festivescha il chantun Grischun il 500avel anniversari da la fusiun da las Trais Lias. Cun sigillar il Patg federal han las Trais Lias mess l'onn 1524 il crap da fundament per il chantun Grischun dad oz. Cun l'approvaziun dal concept detaglià tras la Regenza han cumenzà las preparaziuns detagliadas per las activitads da giubileum.

La Regenza ha approvà il concept detaglià elavurà per las activitads en connex cun il giubileum da «500 onns Stadi liber da las Trais Lias». Uschia cumenzan las preparaziuns detagliadas per las activitads da giubileum da l'onn 2024: ina retscha d'occurrenzas e d'activitads che promovan la convivenza en il chantun e rinforzan l'identitad sco er la conscienza istorica en il Grischun. «La fusiun da las Trais Lias avant 500 onns è stada decisiva ed ha fin oz consequenzas per la vita da las Grischunas e dals Grischuns», motivescha il cusseglier guvernativ Jon Domenic Parolini las activitads da giubileum.

In viv onn 2024 en tut las regiuns linguisticas
Il concept detaglià prevesa in viv onn 2024 en l'entir Grischun. I vegnan organisadas dietas sumegliantas a festas popularas, tranter auter en las chapitalas istoricas Cuira, Tavau e Glion. In contest da poetry slam maina giuvenils en l'entir chantun sin il palc; l'exposiziun ambulanta transporta l'istorgia en moda perceptibla en las vischnancas; in nov arranschament instructiv davart l'istorgia dal Grischun rinforza l'intermediaziun da l'istorgia chantunala a las generaziuns futuras. L'atun 2024 vegn ultra da quai publitgà il «Atlas davart l'istorgia dal Grischun 1524–2024» da l'Institut per la perscrutaziun da la cultura grischuna en stretga collavuraziun cun l'Archiv dal stadi dal Grischun. Tut las activitads da giubileum rinforzan la convivenza e la colliaziun cun il Grischun.

Ideas d'occurrenzas e da projects èn bainvegnidas
La paletta d'occurrenzas, che fa perceptibla l'istorgia e la cultura dal Grischun, duai esser vasta. Ultra da las activitads da giubileum planisadas pon ulteriuras occurrenzas ed ulteriurs projects chattar ina plazza en il program e profitar da las sinergias, da la communicaziun unitara e da la promoziun da la cultura. La direcziun dal project è averta per ideas e dat ad uniuns ed ad instituziuns l'occasiun da s'annunziar cun propostas per occurrenzas culturalas, sco per exempel vernissaschas, preschentaziuns musicalas, producziuns da teater u prelecziuns.

Ulteriuras infurmaziuns davart il giubileum da 500 onns: https://500.gr.ch

Agiunta:

Skizza dal project

Fotografia:

Fotografia dal document respectivamain da la brev federala

Infurmaziuns:

• Cusseglier guvernativ dr. Jon Domenic Parolini, tel. +41 81 257 27 01 (cuntanschibel da las 14.00 fin las 14.30), e‑mail Jondomenic.Parolini@ekud.gr.ch
• Reto Weiss, archivari dal stadi, tel. +41 81 257 28 01 (cuntanschibel da las 13.30 fin las 16.30), e‑mail Reto.Weiss@sag.gr.ch
• Daniel Camenisch, manader dal project 500 onns Stadi liber da las Trais Lias, tel. +41 78 659 63 60 (cuntanschibel da las 13.30 fin las 16.30), e‑mail camenisch@vinavant.ch

Responsabladad: Departament d'educaziun, cultura e protecziun da l'ambient