Il chantun Grischun ha publitgà quest onn per la 26avla giada ina concurrenza per promover projects gronds e la 16avla giada per promover projects pitschens da la lavur culturala professiunala. Da las tut en tut 38 dumondas tar ils projects gronds e 19 dumondas tar ils projects pitschens èn mintgamai tschintg projects vegnids onurads cun ina contribuziun ad in'ovra u cun in stipendi liber, quai cun ina summa totala da 150 000 francs.

Cun ils daners da sustegn da la concurrenza survegnan artistas ed artists la pussaivladad da lavurar vi d'ina ovra creativa, e quai senza squitsch finanzial e professiunal. La finamira è quella da pussibilitar il svilup tematic da projects culturals. Il dretg da sa participar a la concurrenza han artistas ed artists professiunals che han lur domicil dapi almain 2 onns en il chantun Grischun u ch'èn colliads stretgamain cun il chantun Grischun u cun la cultura grischuna. La Cumissiun da concurrenza ha giuditgà quest onn tut en tut 57 dumondas ord las spartas da l'art applitgà e figurativ, dal film, da l'istorgia e memoria, da la litteratura, da la musica, dal saut e teater.

Il schef dal Departament d'educaziun, cultura e protecziun da l'ambient, cusseglier Jon Domenic Parolini, ha decidì – sin proposta da la Cumissiun da concurrenza e da l'Uffizi da cultura – davart la surdada da las contribuziuns ad ovras.

Las suandantas tschintg artistas ed artists han survegnì ina contribuziun da mintgamai 20 000 francs per lur ovra (projects gronds):

• Num: Astrid Alexandre, Cuira
  Sparta: Musica
  Project: «Resonanzas»
• Num: Coco Schwarz, Turitg
  Sparta: Art figurativ / musica
  Project: «Songs of the Vanishing Glaciers»
• Num: Curdin Tones, Tschlin
  Sparta: Art figurativ / musica
  Project: «Il plurifon»
• Num: Albert Vinzens, Kassel (Germania)
  Sparta: Litteratura / istorgia e memoria
  Project: «Miina Papa»
• Num: Ellen Wolf, Turitg
  Sparta: Saut
  Project: «Moving Mountains. Connecting across boarders»

Las suandantas tschintg artistas ed artists han survegnì ina contribuziun da mintgamai 10 000 francs per lur ovra (projects pitschens):

• Num: Notta Caflisch, Winterthur
  Sparta: Art figurativ / istorgia e memoria
  Project: «Morins»
• Num: Margrit Cantieni Casutt, Cuira
  Sparta: Litteratura
  Project: «Franka oder das Gewicht der Heimat» (titel da lavur)
• Num: Lea Catrina, Flem Casa d'Uaul
  Sparta: Litteratura
  Project: «Waldbad»
• Num: Robert Grossmann, Farschno
  Sparta: Musica
  Project: «Gianni Schicchi, il tribunel»
• Num: Sabine Kaufmann Staub, Sent
  Sparta: Istorgia e memoria
  Project: «Tommaso Frizzoni (1760–1845)»

Infurmaziuns:

Andrea Conrad, manadra Promoziun da la cultura, Tel. +41 81 257 48 07 (cuntanschibla da las 14.00 fin las 15.00), e‑mail Andrea.Conrad@afk.gr.ch

Responsabladad: Uffizi da cultura