Bleras giadas cumenza la violenza a chasa en moda subtila e zuppada. Il tema central dals «Dis d'acziun cunter violenza a chasa» da quest onn en il Grischun è perquai la violenza psichica. Dals 25 da november fin ils 10 da december 2023 èn planisadas numerusas occurrenzas ed acziuns en l'entir chantun.
La violenza a chasa na cumenza betg pir cun in egl blau, mabain savens gia bler pli baud. Quai sa mussa per exempel en la furma da la violenza psichica, uschia che persunas vegnan permanentamain controlladas, umiliadas e smanatschadas. La violenza psichica na lascha savens betg enavos blessuras visiblas, po dentant avair consequenzas gravantas per las persunas pertutgadas. Quest gener da violenza po chaschunar ina dissoluziun da la conscienza da sasez ed ina isolaziun sociala. En Svizra capitan mintga onn var 20 000 delicts da violenza a chasa. La mesadad da quels capitan en relaziuns da pèrs.
Violenza a chasa na vegn betg en dumonda
En l'entir chantun Grischun mettan organisaziuns ed interpresas cun ina paletta variada d'occurrenzas in signal cunter la violenza a chasa. Plirs edifizis vegnan illuminads cun ina colur oranscha traglischanta, duas installaziuns d'art, ina sairada da poetry-slam ed ina prelecziun d'ina persuna pertutgada commovan ed alarmeschan. Pliras represchentaziuns da films e plirs inputs specifics gidan a chapir meglier ed a savair dapli davart questa tematica. L'acziun «Violenza a chasa na vegn betg en dumonda», nua che las pasternarias vendan lur paun en stgarnuzs spezials, ha lieu quest onn a Tavau, en il Partenz, en l'Engiadin'Ota ed en l'Engiadina Bassa, en la Surselva, en las valladas dal sid sco er a Cuira e conturns.
Las suandantas organisaziuns ed interpresas sa participeschan als dis d'acziun: Buachlada Kunfermann, Chasa per dunnas dal Grischun, Giuventetgna Cadi, Lavur cun giuvenils Cuira, Biblioteca chantunala, Keramik-Werkstatt, Malwege, Post da cussegliaziun per l'agid a victimas dal Grischun, Associaziun svizra da las academicras, Club Soroptimist e Club Zonta.
Il Grischun ha plinavant inizià la campagna da sensibilisaziun interchantunala «Toxic Love» che ha la finamira d'identifitgar a temp la violenza a chasa. A persunas pertutgadas ed a persunas participadas, dentant er a terzas persunas betg participadas duai vegnir gidà da percorscher ils signals d'avertiment e da dumandar agid a temp. Toxic Love è ina campagna da cuminanza dals chantuns Basilea-Citad, Glaruna, Grischun, Lucerna, Sursilvania, Schaffusa, Solothurn e Son Gagl.
Agiunta:
Carnet da program dals Dis d'acziun 2023
Infurmaziuns:
Madlaina Baselgia, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11, e‑mail Madlaina.Baselgia@soa.gr.ch
Responsabladad: Uffizi chantunal dal servetsch social
Dis d'acziun sin l'entir mund
Dals 25 da november, il Di internaziunal cunter la violenza envers dunnas, fin ils 10 da december, il Di dals dretgs umans, sa preschentan mintga onn differentas organisaziuns a la publicitad per sensibilisar per la tematica e per s'engaschar a favur d'ina societad senza violenza.
En il Grischun han lieu mintga onn «Dis d'acziun cunter violenza a chasa». Il chantun coordinescha e sustegna las occurrenzas e las acziuns regiunalas che mettan en il focus mintga onn ina furma da la violenza a chasa.
Ils «Dis d'acziun cunter violenza a chasa» en il Grischun èn inspirads da las iniziativas dals dus moviments internaziunals «Orange-Days» e «16 dis cunter la violenza envers dunnas». L'illuminaziun oranscha dals edifizis ch'èn visibels durant quests 16 dis sin l'entir mund, metta simbolicamain in signal cunter violenza.