Il program annual cuntegna las finamiras ed ils terms ils pli impurtants per l'onn respectiv. Per l'onn 2024 ha la Regenza formulà tut en tut 88 finamiras da l'onn concretas. Ils puncts centrals dal program annual da quest onn èn l'optimaziun da la digitalisaziun, la tgira d'uffants cumplementara a la famiglia sco er ils secturs da sanadad e da traffic. Il program annual 2024 è l'ultim program annual da la perioda da planisaziun dal program da la Regenza 2021–2024.
Il program da la Regenza ed il plan da finanzas èn – tenor la Constituziun chantunala – ils instruments centrals da la gestiun strategica e politica dal chantun Grischun. Ensemen furman els la planisaziun dals puncts centrals da la Regenza a vista mesauna. Il program da la Regenza 2021–2024 sa focussescha sin ils elements centrals «Digitalisaziun ed innovaziun», «Green Deal» sco er «Chantun da muntogna multifar». Ils puncts centrals da svilup dal program da la Regenza vegnan mintgamai concretisads e realisads en ils programs annuals. Il program annual 2024 cumpiglia tut en tut 88 finamiras da l'onn ed è vegnì tractà dal Cussegl grond en la sessiun da december en il rom da la missiva tar il preventiv. Ils puncts centrals ils pli impurtants da la planisaziun annuala 2024 èn:
Acceleraziun da la transfurmaziun digitala
Cunquai ch'il Cussegl grond ha approvà en la sessiun da december 2023 la «Strategia Administraziun digitala chantun Grischun 2024–2028» e mess a disposiziun las resursas persunalas e finanzialas necessarias, è vegnida stgaffida – per il chantun Grischun – ina basa strategica per accelerar considerablamain la digitalisaziun da l'administraziun chantunala. En in'emprima fasa sto la nova strategia vegnir introducida e realisada pass per pass. Concretamain sa tracti d'occupar las plazzas novas cun persunas adattadas, d'implementar la nova organisaziun executiva sco er d'instituziunalisar ils novs andaments e process. A medem temp duai la purschida da prestaziuns digitalas vegnir extendida cuntinuadamain per la populaziun e per las interpresas. Durant l'onn current vegn mess en funcziun il «ePortal». Il «ePortal» è ina plattafurma electronica, nua che prestaziuns impurtantas dal chantun vegnan messas a disposiziun en furma digitala. La populaziun po nizzegiar da tuttas uras las prestaziuns. La purschida da prestaziuns digitalas vegn extendida e cumplettada cuntinuadamain durant ils proxims onns en il rom da la «Strategia Administraziun digitala chantun Grischun 2024–2028».
Optimaziuns sistematicas en il sectur da traffic e da sanadad sco er en la tgira d'uffants cumplementara a la famiglia
Er en il sectur da traffic èn previsas optimaziuns concretas da la purschida. Per l'ina vegnan realisads correspundentamain ils projects da renovaziun ed ils projects novs ch'èn previs en il Program da construcziun da vias. Plinavant vegn elavurà il Program da construcziun da vias 2025–2028. Quel vegn lura deliberà da la Regenza e suttamess al Cussegl grond per laschar prender enconuschientscha. Ultra da quai vegn il tact da mes'ura realisà successivamain sin la rait da la Viafier retica (Retica30). En pli sto la concentraziun da l'urari vegnir cuntinuada e surpigliada correspundentamain sin las lingias da bus las pli impurtantas. Uschia po la cuntanschibladad da las regiuns e da las vischnancas tras il traffic vegnir extendida e meglierada pass per pass. En il sectur da sanadad, ch'è pertutgà spezialmain da la mancanza da persunas spezialisadas, è planisada in'offensiva da scolaziun en il rom da la realisaziun da l'Iniziativa da tgira. Uschia vulan la Confederaziun ed ils chantuns eliminar resp. reducir considerablamain la mancanza da tgirunzas e da tgirunzs. Meglieraziuns evidentas sa mussan er per las famiglias. Cun exequir pass per pass la Lescha davart la promoziun da la tgira d'uffants cumplementara a la famiglia vul la Regenza augmentar la cumpatibilitad da la famiglia cun l'activitad da gudogn.
Rinforzar il Grischun sco lieu da furmaziun e da perscrutaziun e far valair decididamain ils interess grischuns sin plaun naziunal
En il sectur da furmaziun e da perscrutaziun èsi previs d'actualisar la Strategia chantunala da scola auta e da perscrutaziun. Sin fundament da la nova strategia sco er sin basa da la revisiun parziala da la Lescha davart las scolas autas e la perscrutaziun duai lura vegnir elavurada e definida la cunvegna da prestaziun 2025–2028 cun la Scola auta spezialisada dal Grischun (SASGR). En questa cunvegna vegn concretisada e fixada liantamain la purschida da prestaziuns da la SASGR a curta fin a media vista.
Actualmain vegn elavurà il Rapport 2020–2025 davart l'efficacitad da la gulivaziun da finanzas tranter la Confederaziun ed ils chantuns (NGF). La Regenza vul accumpagnar activamain l'elavuraziun da quest rapport e far valair decididamain ils interess respectivs dal chantun Grischun sin plaun naziunal resp. interchantunal.
Agiuntas:
Infurmaziuns:
President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel per telefon da las 14.00 fin las 15.00), e‑mail Jondomenic.Parolini@ekud.gr.ch
Responsabladad: Regenza