L'onn 2024 festivescha il chantun Grischun il giubileum da 500 onns uniun da las Trais Lias. È istorgia ina materia sitga e lungurusa? Insumma betg! Al poetry slam contest mussan giuvenils, co ch'ins inscenescha istorgia cun blers pleds ed en moda captivanta. Anc fin la fin da favrer èsi pussaivel da s'annunziar per il contest.
La lingua viva – pir da dretg en il Grischun, l'unic chantun triling da la Svizra. Durant l'onn da giubileum 2024 deditgeschan giuvenils agens pleds a l'istorgia ed al temp preschent dal Grischun, quai a chaschun dal captivant poetry slam contest. Ils giuvenils che s'interessan per il project e ch'èn s'annunziads, vegnan envidads a lavuratoris en lur regiun. Durant quatter mezs dis als vegn rendida enconuschenta l'istorgia dal Grischun, als vegni gidà a scriver texts, e vegnan els preparads per la preschentaziun sin tribuna. Ils lavuratoris han lieu en las trais linguas chantunalas ed en las regiuns da las participantas e dals participants.
Qualificaziun e final
Suenter la fin dals lavuratoris cumpetan ils giuvenils in cun l'auter en concurrenzas da qualificaziun e preschentan la performance ch'els han emprendì. Questas concurrenzas èn publicas ed han lieu tenor las reglas vertentas d'occurrenzas da slam. La meglra u il meglier da mintga qualificaziun sa participescha al grond final. La victura u il victur dal final sa qualifitgescha plinavant per ils campiunadis svizzers U20 da peotry slam 2025.
Il coach
«Quest format permetta a las participantas ed als participants da far experientschas preziusas e rinforza lur sentiment per la patria. Da star sin tribuna, n'è dentant betg adina simpel», declera il poet da slam, cabarettist e textader versà Jachen Wehrli. El accumpogna ils giuvenils durant l'entir process. L'um ch'è naschì a Cuira, enconuscha la tribuna, el sustegna e motivescha dal lavuratori fin al final.
Giuvenils da l'annada 2004 e pli giuvens, as annunziai ussa
Ils giuvenils da tut las regiuns linguisticas èn envidads cordialmain da sa participar al project. Annunzias èn pussaivlas fin la fin da favrer, ils lavuratoris cumenzan il mars. Ulteriuras infurmaziuns ed il formular d'annunzia: https://500.gr.ch/rum/poetry-slam-contests/
Durant l'onn da giubileum han lieu numerusas activitads en tut las regiuns linguisticas. Infurmaziuns davart las activitads da giubileum chattan ins da tut temp sut https://500.gr.ch/rum/.
Agiuntas:
Infurmaziuns:
Responsabladad: Departament d'educaziun, cultura e protecziun da l'ambient