Il Departament d'economia publica e fatgs socials ha laschà analisar il spazi d'abitar stgars en il chantun Grischun. Ils resultats conferman la situaziun fitg precara sin il martgà d'abitaziuns e mussan ils motivs. Els laschan dentant sperar, ch'i dettia ina stabilisaziun e che la situaziun na sa pegiureschia betg vinavant. A medem temp elavura il chantun Grischun las basas per extender la promoziun chantunala d'abitaziuns.
L'avust 2023 ha il Departament d'economia publica e fatgs socials (DES) organisà in barat d'infurmaziuns e d'experientschas cun las represchentantas ed ils represchentants interessads da las vischnancas grischunas davart il tema «spazi d'abitar stgars». Silsuenter ha il DES incumbensà la firma Avobis Group, ina furnitura da servetschs independenta en il sectur dal svilup e da la gestiun d'immobiglias, d'analisar las basas. Ils ultims onns è il dumber d'abitaziuns vidas sa reducì fermamain ed ils pretschs da las abitaziuns èn creschids. Considerond quai valitescha l'analisa la situaziun actuala sin il martgà e fa ina perspectiva a curta vista per il chantun.
In ferm augment dal dumber da chasadas sco motiv principal
Decisiv per il basegn da spazi d'abitar è il fatg, ch'il dumber da chasadas è s'augmentà ils ultims onns pli fitg che la populaziun. Sin plaun chantunal ed en bleras regiuns han ins construì a partir dal 2019 memia paucas abitaziuns per cuvrir la dumonda d'emprimas abitaziuns, d'abitaziuns da persunal, ma er d'abitaziuns da vacanzas. Il dumber da persunas novdomiciliadas è s'augmentà e l'interess per abitaziuns da vacanzas è creschì. In ulteriur factur central per la stgarsezza d'abitaziuns è, che las chasadas daventan pli e pli pitschnas. Bunamain trais quarts da las chasadas èn chasadas d'ina persuna u da duas persunas. Mo en 16 pertschient da las chasadas vivan quatter u dapli persunas.
Memia paucas abitaziuns vidas per ch'il martgà funcziunia
Il dumber d'abitaziuns vidas ed il svilup dals pretschs d'immobiglias èn clers signals per in martgà d'abitaziuns precar. Sin il martgà d'abitaziuns da locaziun è la situaziun pli critica che sin il martgà d'abitaziuns en proprietad. Bain maina la quota d'abitaziuns vidas en il Grischun in zic en errur, perquai ch'il dumber total resguarda er las abitaziuns secundaras che n'èn strusch relevantas per giuditgar il dumber d'abitaziuns vidas. La quota importa tuttina mo circa 1 pertschient. Per ch'il martgà d'abitaziuns da locaziun funcziunia, duess questa quota dentant importar enturn 1,5 pertschient. Tras quai creschan ils tschains da locaziun ed ils custs per tschertgar in'abitaziun.
L'activitad da construir prenda schlantsch
Er la pitschna activitad da construir novas abitaziuns ils ultims onns, primarmain da persunas privatas e main da societads da construcziun e d'immobiglias, ha chaschunà la tensiun sin il martgà actual. L'activitad da construir ha bain puspè prendì in zic schlantsch en il Grischun, cumpareglià cun la Svizra. Tar ils tschains da locaziun e tar ils pretschs da las abitaziuns purschidas, tar il volumen d'abitaziuns purschidas e tar il dumber d'abitaziuns vidas sa mussan moviments laterals, uschia che la tensiun sin il martgà pudess avair cuntanschì ses punct culminant. Il dumber da projects da construcziun è dentant anc adina memia pitschen per purtar a curta fin a media vista ina clera detensiun sin il martgà d'abitaziuns.
Politica activa da terren e da spazi d'abitar
Sin basa da quests svilups èsi inditgà da betg sa fidar mo sin in'eventuala detensiun conjuncturala, mabain dad esser activ en il sectur da la politica da terren e da spazi d'abitar. Actualmain prendan intginas vischnancas (turisticas) mesiras correspundentas.
Il chantun elavura las basas per extender la promoziun chantunala d'abitaziuns. La revisiun da la Lescha davart la construcziun d'abitaziuns socialas e la meglieraziun da las relaziuns d'abitar en il territori da muntogna va en consultaziun en il decurs dal segund semester da l'onn 2024.
Agiunta:
Analisa da las basas «Spazi d'abitar stgars» en il chantun Grischun
Infurmaziuns:
Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel da las 13.00 fin las 14.00), e‑mail Marcus.Caduff@dvs.gr.ch
Responsabladad: Departament d'economia publica e fatgs socials