La Regenza conceda il Premi grischun da cultura 2024 a Clau Scherrer, naschì e creschì si a Trun. Il premi è dotà cun 30 000 francs. Sco manader da l'ensemble vocal Origen e dal cantus firmus Surselva sco er sco dirigent da chors da vallada e da chors da giuvenils, ha il musicist grischun influenzà ils ultims onns la musica en il Grischun. El è in pianist excellent ed in promotur spiertus da la chanzun rumantscha.

Plinavant surdat la Regenza sis premis da renconuschientscha e tschintg premis da promoziun da mintgamai 20 000 francs. Ils premis vegnan surdads ils 31 da matg 2024 en il rom d'ina festa en la sala da cultura a Trun.

Glistada tut las persunas premiadas da l'onn 2024

© Benjamin Hofer

La Regenza ha prendì posiziun tar in project da revisiun da la Confederaziun concernent la lavur da dumengia en quartiers da turissem urbans. Tenor quest project na duai concretamain la lavur da dumengia betg pli esser suttamessa a l'obligaziun da dumandar ina permissiun en fatschentas da vendita ch'èn situadas en quartiers da grondas citads cun in turissem internaziunal e che han ina tschert sortiment da rauba.

La Regenza refusa il project da revisiun e propona da repassar il text respectiv da l'ordinaziun. Ins sto tralaschar regulaziuns spezialas cumplitgadas cun differents criteris che na sa laschan strusch realisar en la pratica. I sto er vegnir evità da stgaffir inegualitads per differents territoris u per differents manaschis.

En il senn d'in tractament egual duain valair ils medems princips e las medemas reglas fundamentalas per tut ils areals da turissem, independentamain dal fatg, nua ch'els èn situads (citad, champagna, muntognas). Quai vala areguard il lieu, dentant er areguard il sortiment (basegns da las turistas e dals turists), il gener da las turistas e dals turists (internaziunalitad), dals manaschis (tut ils manaschis, er fatschentas da vendita tutgan latiers), la stagiunalitad e plinavant er areguard las mesiras da cumpensaziun. Sch'ils chantuns duain obtegnair dapli libertads d'agir en quest rom, è quai positiv.

Consultaziun dal Departament federal d'economia, furmaziun e retschertga

La Regenza ha approvà in project da correcziun d'in curs d'aua en la vischnanca da Tschappina, quai per construir rempars en il Maitlatobelbach. Dals custs totals da var 703 000 francs surpiglian il chantun e la Confederaziun – tenor la cunvegna da program da la Nova gulivaziun da finanzas (NGF) – maximalmain 386 650 francs.

Il Maitlatobelbach è in torrent che maina glera e che nascha tranter il Lüschgrat ed il Bischolapass sin la Mantogna. En ses percurs mesaun passa el sper Ober Tschappina e sper Unter Tschappina. Ils 4 da fanadur 2022 hai dà ina malaura sin la Mantogna, che ha fatg ir il Maitlatobelbach sur las rivas ora. En il territori dal Sunnaheim n'ha la glera betg pli laschà passar l'aua. L'aua da las inundaziuns è sa fatga strada sur vias ed è penetrada en edifizis. Ils rempars existents da l'aual èn vegnids destruids e parts da las scarpas schlavadas.

Il project da construcziun qua avant maun cuntegna ussa mesiras da la construcziun idraulica sin plirs trajects. Sin il traject sura duain vegnir plazzads gronds blocs da crap da circa 2 fin 3 tonnas en il letg da l'aual, quai per meglierar la stabilitad. Sin in ulteriur traject duai vegnir disfatga la punt existenta «Sunnaheim» e remplazzada cun ina nova construcziun pli gronda. Supplementarmain èsi previs tranter auter, da concepir geometricamain da nov il curs da l'aual en la vischinanza da la punt e d'al munir cun rempars.

La Regenza ha approvà la revisiun parziala da la planisaziun locala che la vischnanca da Flem aveva concludì ils 18 da zercladur 2023. Cun quai ha ella stgaffì las premissas planisatoricas per realisar l'ovra electrica da laina «Prau Pulté».

En il futur duai quest project proveder cun chalur a distanza ils territoris Flem Casa d'Uaul, Prau la Selva e Laax Murschetg. L'implant duai producir chalur sin basa da stalizzas che vegnan elavuradas en moda persistenta ed uschenavant sco pussaivel or da laina regiunala. Per garantir in'utilisaziun uschè spargnusa sco pussaivel da las resursas da laina durant il manaschi da stad, è previs plinavant in sistem a pumpa da stgaudar d'auta prestaziun, che sa basa sin aria ed aua en cumbinaziun cun in grond implant fotovoltaic. Per realisar l'implant da chalur a distanza e per al colliar cun il traffic èsi necessari da runcar ina surfatscha da 2662 meters quadrat.

© Comet Photoshopping GmbH, Dieter Enz