La Regenza grischuna ha nominà Ursin Widmer sco nov manader da l'Uffizi da cultura. El vegn a surpigliar questa funcziun il 1. d'avust 2024.

La Regenza grischuna ha elegì l'um da Favugn da 35 onns Ursin Widmer sco nov manader da l'Uffizi da cultura (UdC). El daventa il successur da Barbara Gabrielli, la quala vegn a surpigliar ina nova sfida suenter avair manà l'uffizi durant 15 onns.

Ursin Widmer posseda in Master of Art en pedagogia da musica, il diplom da mainascola da la Conferenza svizra da las directuras e dals directurs chantunals da l'educaziun publica (CDEP), il diplom da manader da la scola da musica ACMG sco er in CAS en marketing ed en intermediaziun da cultura. Sco mainascola ha el manà la scola da musica dal Scanvetg e la scola da Val Stussavgia. Dapi l'onn 2023 è el en uffizi sco manader dal Post spezialisà per cultura a Tavau.

L'Uffizi da cultura e sias instituziuns èn cumpetents per promover e per intermediar la lavur culturala en il chantun Grischun sco er per perscrutar e per tegnair en salv ils bains culturals prezius dal Grischun. Dal UdC fan part il Servetsch archeologic, la Tgira da monuments, la Biblioteca chantunala, l'Archiv dal stadi, la Promoziun da la cultura e da las linguas sco er ils trais museums chantunals: il Museum d'art, il Museum retic ed il Museum da la natira.

Fotografia agiuntada:

Infurmaziuns:

President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 16.00 fin las 17.00) , e‑mail Jondomenic.Parolini@ekud.gr.ch

Responsabladad: Departament d'educaziun, cultura e protecziun da l'ambient