Patrunas e patruns u persunas estras pon da nov er dumandar online lur dumondas da document d'identitad tar l'Uffizi da migraziun e da dretg civil (UMDC). Il UMDC ha endrizzà in portal correspundent che pussibilitescha da dumandar online tant prolungaziuns sco er emprimas permissiuns. La procedura da permissiun daventa uschia pli effizienta.
Mintga onn vegnan dumandadas circa 40 000 permissiuns tar l'Uffizi da migraziun e da dretg civil dal Grischun. Da nov pon las dumondas da patrunas e patruns u da la persuna estra vegnir liquidadas cumplettamain online. Er l'annunzia tar la vischnanca po vegnir liquidada a medem temp. Las datas necessarias persuenter vegnan transmessas dal UMDC directamain a las vischnancas.
Pli simpel e pli effizient
Cun inoltrar ils formulars da dumonda sur il spurtegl online na ston els betg pli vegnir stampads, suttascrits e tramess per posta al UMDC. Per burgaisas e burgais da la UE/AECL èsi pussaivel d'agiuntar tar l'inoltraziun da la dumonda ina fotografia da la fatscha e la suttascripziun sco agiuntas. Cun questas duas agiuntas èsi directamain pussaivel da laschar producir ils documents d'identitad en format da carta da credit, senza ch'ina visita en in dals dus centers da documents d'identitad a Cuira u Zernez è necessaria.
Ils documents necessaris per elavurar las dumondas pon vegnir agiuntads sco documents gia existents en il format PDF. Sco alternativa datti la pussaivladad d'endatar e d'inoltrar directamain documents sin palpiri, e quai via smartphone cun l'app «GR DocCapture», ch'è er enconuschenta en il sectur da la decleraziun da taglia.
Il UMDC planisescha en il futur ina interfatscha che vegn a pussibilitar ad interpresas cun persunas emploiadas estras da surdar directamain datas existentas en ils sistems da l'agen manaschi al spurtegl online. Datas identicas na ston tras quai betg pli vegnir endatadas pliras giadas. Per ils manaschis èn dentant necessarias per quest intent tschertas adattaziuns dad IT ed investiziuns.
Infurmaziuns:
Markus Haltiner, manader da l'Uffizi da migraziun e da dretg civil, tel. +41 81 257 25 22 (cuntanschibel da las 10.00 fin las 12.00), e‑mail Markus.Haltiner@afm.gr.ch
Responsabladad: Uffizi da migraziun e da dretg civil