Cun la plattafurma Porta Cultura daventa la diversitad culturala dal Grischun accessibla online. En collavuraziun cun numerusas instituziuns chantunalas e culturalas regiunalas è resultà in portal regiunal pluriling ed interdisciplinar che envida da s'infurmar, da retschertgar, da scuvrir e d'experimentar. Porta Cultura renda visibel il patrimoni linguistic e cultural dal Grischun e pussibilitescha da l'utilisar quel. Plinavant rinforza il nov portal la cultura, l'economia ed il turissem sco er la furmaziun en il Grischun.
En il punct central da svilup dal Program da la Regenza 2021–2024 – Render la diversitad culturala visibla ed utilisabla – è vegnida messa la finamira, da crear ina plattafurma per preschentar il patrimoni cultural e linguistic dal chantun Grischun. Porta Cultura è in register digital sco er ina plattafurma da retschertga davart il patrimoni cultural e linguistic dal Grischun sco er davart infurmaziuns ed occurrenzas culturalas. La noziun «cultura» ha conscientamain in senn vast e e na cumpiglia betg mo objects da museum ed archivalias. Ella tanscha dal rastè tradiziunal fin a l'ovra d'art abstracta, da la scrittira medievala fin a la fortezza da la Guerra fraida, da l'Hom Strom fin als nums rurals d'ina vischnanca. L'integraziun d'in chalender d'occurrenzas permetta da colliar il patrimoni cultural istoric cun las activitads culturalas d'ozendi. Porta Cultura envida da scuvrir, d'emprender d'enconuscher e da viver la cultura, l'istorgia ed il temp actual dal Grischun.
Portal nunbirocratic – independent dal lieu – digital
«Ozendi èsi daventà indispensabel da metter a disposiziun cuntegns culturals en moda nunbirocratica, independenta dal lieu ed effizienta, per ch'els possian vegnir duvrads; saja quai da la populaziun, da la furmaziun, da la scienza u da l'economia e dal turissem», declera Barbara Gabrielli, manadra da l'Uffizi da cultura. «Per quest motiv avain nus er dà ina significaziun vasta a la noziun ‹cultura› en il portal». Objects e cuntegns d'instituziuns chantunalas e da numerusas instituziuns culturalas betg chantunalas vegnan preschentads e colliads in cun l'auter. Il spectrum è grond. Integrads na vegnan betg mo objects da la cultura populara, ovras d'art, documents e publicaziuns, mabain er medias audiovisualas, objects natirals e bler auter pli. Cumplettà vegn il register cun in grond dumber d'ovras architectonicas en il chantun ch'èn sut protecziun da monuments sco er cun lieus impurtants da chats archeologics, cun num locals e rurals dal Grischun sco er cun il patrimoni cultural immaterial. Per dar access ad in circul d'utilisaders uschè vast sco pussaivel, ha Porta Cultura ina navigaziun en tschintg linguas.
Besser wissen. Savair meglier. Sapere meglio.
La Porta Cultura ch'è vegnida sviluppada sut la direcziun da l'Uffizi da cultura sa basa sin projects precursurs che han servì sco exempel e ch'èn vegnids concepids e realisads durant ils ultims 15 onns. En il rom dal Program da la Regenza 2009–2012 è per exempel vegnida elavurada ina plattafurma da museums. Sin quella han ils numerus museums grischuns e pli e pli er ils archivs culturals survegnì per l'emprima giada ina cumparsa digitala unifitgada. Porta Cultura profita er da las lavurs preliminaras da differents projects da digitalisaziun. Durant ils ultims onns han il Museum da la natira dal Grischun, il Museum d'art dal Grischun ed il Museum retic prendì mesiras d'inventarisaziun cumplessivas e la Biblioteca chantunala dal Grischun ha fatg avanzar la recataloghisaziun, entant ch'il Servetsch archeologic ha registrà e geolocalisà ils lieus da chats da l'entir chantun. En Porta Cultura èn er vegnids integrads il catalog per ils bains culturals audiovisuals dal chantun Grischun sco er la plattafurma per la cultura architectonica. Tut questas mesiras èn vegnidas iniziadas da l'Uffizi da cultura e realisadas en connex cun ils puncts centrals da svilup dals programs da la Regenza.
Besser wissen. Meglier savair. Sapere meglio.
Sut https://portacultura.gr.ch chattan las persunas interessadas infurmaziuns disponiblas centralmain, captivantas e forsa er nunspetgadas. Porta Cultura envida sin via digitala da sfunsar en la diversitad culturala dal Grischun en il portal, dentant er al lieu. Tras la colliaziun digitala en il portal vegn simplifitgada la retschertga, ed i vegn er generà in grond niz per l'intermediaziun en differents secturs sco la furmaziun, la scienza, l'economia ed il turissem. Perquai è vegnì e vegn tgirà ed extendì il contact cun partenaris e cun instituziuns sco l'Uffizi per la furmaziun media-superiura, l'Uffizi per economia e turissem, Grischun Vacanzas e graubünden Cultura. La registraziun centrala da las datas culturalas porscha novas pussaivladads d'utilisar las datas, da sviluppar e d'evaluar la purschida.
Porta Cultura vegn lantschada la fin d'avrigl cun ina campagna d'animaziun online. A partir dal matg pon ins experimentar Porta Cultura er en l'exposiziun ambulanta «Stgazis grischuns sin viadi. Ina istorgia – Bleras fassettas» per il giubileum da 500 onns Stadi liber da las Trais Lias. «Che la cultura dal Grischun è pli visibla e pli accessibla, rinforza d'ina vart l'identitad chantunala e regiunala e stgaffescha da l'autra vart las meglras premissas per ina vasta integraziun e participaziun a la vita sociala e culturala», sa legra il president da la Regenza Jon Domenic Parolini.
Agiuntas:
Video: