La procedura electronica per la permissiun da construcziun en il Grischun è lantschada. Dapi il cumenzament d'avrigl sa collian las emprimas vischnancas cun la plattafurma digitala «eBau». Fin l'atun 2024 vegnan tut las vischnancas grischunas che vulan nizzegiar la plattafurma, a pudair exequir la procedura per la permissiun da construcziun sin via digitala. Tant per las petentas ed ils petents sco er per las autoritads daventi pli simpel d'inoltrar e d'elavurar dumondas da construcziun.
Gia l'atun 2023 han otg vischnancas cumenzà cun in manaschi da pilot. La plattafurma per permissiuns da construcziun è vegnida testada ed optimada en las vischnancas da Bravuogn Filisur, Breil, Favugn, Panaduz, Puntraschigna, Samedan, Tujetsch e Tumleastga. Ussa vegn la procedura electronica per la permissiun da construcziun (ePPC) introducida en l'entir chantun en trais etappas: l'avrigl, il zercladur ed il settember 2024 vegnan mintgamai connectadas var 20 fin 30 vischnancas.
Pli simpel e pli svelt grazia ad «eBau»
Sin la plattafurma d'internet https://ebau.gr.ch vegnan las petentas ed ils petents manads pass per pass tras il process per registrar ina dumonda da construcziun. Uschia vegnan per exempel las datas da basa davart il bain immobigliar inseridas automaticamain cun agid d'infurmaziuns dal sistem d'infurmaziun geografica (SIG). Ils plans pon vegnir chargiads si sco PDF.
Tut ils documents stattan a disposiziun en furma digitala e vegnan tramess vinavant en furma digitala u – meglier ditg – rendids accessibels sur la plattafurma. Er per las autoritads communalas e chantunalas è quai ina clera meglieraziun en la procedura per la permissiun da construcziun. Il giudicament na po pia betg mo vegnir fatg pli svelt, mabain er en moda pli effizienta.
Las petentas ed ils petents pon utilisar gratuitamain la plattafurma «eBau». Profitar profitan er las vischnancas: Il manaschi da la plattafurma vegn finanzià fin l'onn 2029 tras il chantun. Tgi che ha problems tecnics, survegn da tuttas uras sustegn d'ina hotline.
Element central da la «Strategia Administraziun digitala»
Per il chantun Grischun è la partenza da la procedura electronica per la permissiun da construcziun in term impurtant. Il project è ina part da la «Strategia Administraziun digitala chantun Grischun 2024–2028». Sia finamira è da stgaffir soluziuns pli effizientas e pli favuraivlas per las utilisadras ed ils utilisaders, per las interpresas sco er per las collavuraturas ed ils collavuraturs da l'administraziun communala e chantunala.
Er vischnancas, biros d'architectura e posts spezialisads chantunals èn stads involvids en la planisaziun ed en il svilup da la plattafurma «eBau». Questas lavurs han durà var 3 onns. Durant quests 3 onns han ins eruì ils basegns da las gruppas en mira, examinà e reducì il dumber ed il cuntegn dals formulars (er per permissiuns supplementaras), formulà carnets d'obligaziuns, organisà l'exposiziun publica, tschernì l'interpresa offerenta e la finala sviluppà la plattafurma. Il svilup da la plattafurma sco tala ha durà 1 onn.
La plattafurma ch'è ussa disponibla ha gia survegnì blers resuns positivs da las vischnancas da pilot sco er da lur emprimas petentas e petents. Er suenter ch'ella è vegnida messa en funcziun, vegn la plattafurma «eBau» meglierada cuntinuadamain per tegnair quint da las pretensiuns dal temp digital. Diversas funcziuns supplementaras vegnan gia sviluppadas per optimar il sustegn dals process. Per quest intent tgira il chantun Grischun in stretg barat cun auters chantuns. Quai permetta da reducir ils custs da svilup e da metter a disposiziun facilmain las experientschas.
Links:
- Infurmaziuns detagliadas davart l'introducziun e l'utilisaziun da la plattafurma «eBau» survegnan las petentas ed ils petents directamain tar lur vischnanca sco er sin www.ebbv.gr.ch
- Tge vischnancas ch'èn participadas ad «eBau» e cura che la colliaziun è planisada, mussa ina survista sin ebau.gr.ch
Infurmaziuns:
Richard Atzmüller, manader da l'Uffizi per il svilup dal territori, tel. +41 81 257 23 21 (cuntanschibel da las 13.30 fin las 15.00), e‑mail Richard.Atzmüller@are.gr.ch
Responsabladad: Uffizi per il svilup dal territori